ҲИЗБИ ХАЛҚИИ ДЕМОКРАТИИ ТОҶИКИСТОН — ҲАМҚАДАМИ ИСТИҚЛОЛ. Бо чунин унвон дар ноҳияи Фирдавсӣ барномаи фарҳангӣ доир шуд

ДУШАНБЕ, 21.08.2026 /АМИТ «Ховар»/. Бахшида ба 35-солагии Истиқлолияти давлатӣ бо ташаббуси Кумитаи Иҷроияи Марказии Ҳизби Халқии Демократии Тоҷикистон дар Муассисаи давлатии «Боғи фарҳангу фароғатии ба номи Абдулқосим Фирдавсӣ» таҳти унвони «Ҳизби Халқии Демократии Тоҷикистон — ҳамқадами Истиқлол» ҳамоиши сиёсӣ-фарҳангии аъзои ҳизб баргузор гардид. Дар ин хусус ба АМИТ «Ховар» аз Ҳизби Халқии Демократии Тоҷикистон дар ноҳияи Фирдавсӣ хабар доданд.

Меҳмонону иштирокчиён бо намоиши дастовардҳои ташкилоти ибтидоии ҳизбӣ дар соҳаҳои маорифу тандурустӣ, фарҳангу иҷтимоӣ, ҷавонону варзиш, занон, саноату истеҳсолот, ҳунарҳои мардумӣ ва корҳои ободониву созандагӣ шинос шуданд.

Иштирокдорон иброз намуданд, ки нақши Истиқлоли давлатӣ дар пешрафти тамоми соҳаҳои мамлакат назаррас буда, заминагузори асосии эҳёи дубораи анъанаҳои аҷдодӣ, худшиносии миллӣ, таҳкими суботи саросарӣ, ваҳдати миллӣ, пешрафту ободӣ, расидан ба ҳадафҳои стратегӣ мебошад.

Ҳизби Халқии Демократии Тоҷикистон суботи сиёсӣ ва дастовардҳои замони соҳибистиқлолиро асоси иродаи озоди мардум дониста, барои пешрафти Ҷумҳурии Тоҷикистон идеяи истиқлолият ва озодиро таҳким бахшида, барои пойдории сулҳу ваҳдати миллӣ, рушду нумӯи иқтисодиёт, илму фарҳанг ва дар маҷмуъ давлатдории миллӣ саъю талош менамояд.

Таҷлили 35-солагии Истиқлоли давлатӣ барои ҳар фарди ватандӯст, хештаншиносу меҳанпараст ва ҷонибдори сулҳу оромӣ ҷашни муқаддас ва хотирмон аст.

АКС: Ҳизби Халқии Демократии Тоҷикистон дар ноҳияи Фирдавсӣ