Бо дастури Пешвои миллат ба оилаи аз офати табиӣ зарардида дар Кӯлоб хонаи нави истиқоматӣ тақдим гардид

Август 17, 2026 20:00

ДУШАНБЕ, 17.08.2026 /АМИТ «Ховар»/. 17 август Сарвазири Ҷумҳурии Тоҷикистон Қоҳир Расулзода ба шаҳри Кӯлоб ва ноҳияи Шамсиддин Шоҳини вилояти Хатлон сафари корӣ анҷом дода, бо рафти корҳои сохтмонӣ, ободонӣ ва татбиқи лоиҳаҳои иҷтимоию иқтисодӣ шинос шуд.

Сафари кории Сарвазири мамлакат дар шаҳри Кӯлоб аз шиносоӣ бо рафти корҳои сохтмонии марҳилаи дуюми Муассисаи таҳсилоти миёнаи умумии №47 оғоз гардид. Бинои нави таълимӣ барои 480 хонанда пешбинӣ шуда, аз се ошёна ва синфхонаҳои фаннӣ, озмоишгоҳҳо ва дигар ҳуҷраҳои зарурӣ иборат мебошад. Дар раванди сохтмони муассиса мутахассисони ватанӣ ҷалб гардида, истифодаи масолеҳи хушсифати истеҳсоли дохилӣ ба роҳ монда шудааст.

Зимни шиносоӣ таъкид гардид, ки фароҳам овардани шароити муносиб барои таълиму тарбияи насли наврас ва таҳкими заминаи моддию техникии муассисаҳои таълимӣ аз самтҳои муҳими сиёсати иҷтимоии давлат ба ҳисоб меравад.

Дар идомаи сафари корӣ дар шаҳри Кӯлоб Сарвазири мамлакат маркази хизматрасонии нақлиётиро мавриди истифода қарор дод. Марказ бо ташаббуси соҳибкори маҳаллӣ бунёд гардида, барои 30 нафар ҷойи кори доимӣ фароҳам овардааст. Дар марказ бо истифода аз таҷҳизоти муосир ба сокинон намудҳои гуногуни хизматрасонии нақлиётӣ пешниҳод карда мешаванд.

Иттилоъ дода шуд, ки рушди соҳибкории истеҳсолӣ ва хизматрасонӣ, таъсиси ҷойҳои нави корӣ ва ҷалби бештари соҳибкорон ба корҳои ободонию созандагӣ барои рушди иқтисодию иҷтимоии шаҳр заминаи мусоид фароҳам меорад.

Дар идома Сарвазири мамлакат бо дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба оилае, ки манзили истиқоматиаш бар асари офати табиӣ пурра хароб гардида буд, хонаи нави истиқоматӣ бо тамоми шароити зарурӣ ва ашёи рӯзгор сохташударо тақдим кард.

Дар шаҳри Кӯлоб ҳамзамон рафти корҳои сохтмонӣ дар Донишкадаи такмили ихтисос ва бозомӯзии кормандони соҳаи маориф мавриди таваҷҷуҳ қарор гирифт. Муассисаи мазкур дар баланд бардоштани сатҳи касбӣ, дониш ва малакаи омӯзгорон нақши муҳим дошта, бунёди он ба таҳкими заминаи таълимию методии соҳаи маориф мусоидат менамояд.

Сарвазири мамлакат зимни шиносоӣ таъкид намуд, ки иншооти иҷтимоӣ бояд бо риояи меъёрҳои сохтмонӣ, талаботи муосир ва сифати баланд бунёд гардида, барои истифодаи дарозмуддат омода карда шаванд.

Инчунин дар хиёбони Исмоили Сомонии шаҳр Сарвазири Ҷумҳурии Тоҷикистон Қоҳир Расулзода бинои баландошёнаи истиқоматӣ ва маркази хизматрасониро мавриди истифода қарор дод. Бинои навбунёд бо назардошти талаботи муосири шаҳрсозӣ бунёд гардида, барои сокинон шароити муносиби зиндагӣ фароҳам оварда шудааст.

Дар маркази хизматрасонии иншоот барои 20 нафар аз сокинон ҷойҳои кории доимӣ фароҳам оварда шудааст. Мавҷуд будани чунин иншооти муосир ба рушди инфрасохтори шаҳр, беҳтар гардидани симои меъмории он ва баланд бардоштани сатҳи хизматрасонии иҷтимоию маишӣ мусоидат менамояд.

Дар шаҳри Кӯлоб Сарвазири Ҷумҳурии Тоҷикистон Қоҳир Расулзода аз рафти корҳои сохтмонӣ ва ободонию созандагӣ дар бинои Китобхонаи вилоятии ба номи Садриддин Айнӣ боздид ба амал овард. Зимни боздид аз ҷараёни корҳои сохтмонӣ, сифати корҳои анҷомдодашуда ва раванди иҷрои корҳои боқимонда мавриди таваҷҷуҳ қарор гирифт.

Таъкид гардид, ки бунёд ва ба истифода додани чунин иншооти иҷтимоӣ дар фароҳам овардани шароити мусоиди таълиму тарбия нақши муҳим дошта, бояд корҳои сохтмонӣ бо сифати баланд ва мутобиқ ба талаботи муосир ба анҷом расонида шаванд.

Сарвазири мамлакат инчунин бо рафти корҳои таъмирӣ дар варзишгоҳи марказии шаҳри Кӯлоб шинос шуд. Гуфта шуд, ки рушди инфрасохтори варзишӣ барои ҷалби ҷавонону наврасон ба варзиш, тарғиби тарзи ҳаёти солим ва рушди намудҳои гуногуни варзиш аҳамияти муҳим дорад.

Сафари кории Сарвазири мамлакат дар ноҳияи Шамсиддин Шоҳин идома ёфт. Дар ин ноҳия низ ба рушди соҳаи маориф, фароҳам овардани шароити муносиб барои таълиму тарбияи хонандагон ва бунёди инфрасохтори иҷтимоӣ таваҷҷуҳи хос зоҳир гардид.

Дар деҳаи Доғистон бинои иловагии назди Муассисаи таҳсилоти миёнаи умумии №4 барои 360 хонанда мавриди истифода қарор гирифт.

Ҳамзамон дар деҳоти Саричашма ва Лангардара биноҳои иловагӣ дар назди муассисаҳои таҳсилоти миёнаи умумии №22 ва №36 бунёд гардидаанд. Иншооти нав имконият медиҳанд, ки шумораи ҷойҳои нишаст зиёд гардида, шароити таълим барои хонандагон беҳтар карда шавад.