Ҷавонони Тоҷикистон дар Фестивали байналмилалии ҷавонон-2026 дар Екатеринбург иштирок намуданд

ДУШАНБЕ, 19.09.2026 /АМИТ «Ховар»/. Ҷавонони Тоҷикистон дар Фестивали байналмилалии ҷавонон-2026, ки дар шаҳри Екатеринбурги Федератсияи Русия баргузор гардид, фаъолона иштирок намуда, дар барномаҳои гуногуни фестивал иқтидори зеҳнӣ, малакаҳои касбӣ, ташаббускорӣ ва фарҳанги миллии кишварро муаррифӣ карданд. Дар ин хусус мухбири АМИТ «Ховар» хабар медиҳад.

Фестивали байналмилалии ҷавонон-2026 ба яке аз майдонҳои муҳими муколамаи ҷавонон, мубодилаи таҷриба ва таҳкими робитаҳои дӯстона байни намояндагони кишварҳои гуногун табдил ёфт. Дар доираи он вохӯриҳо, мубоҳисаҳо, барномаҳои омӯзишӣ ва чорабиниҳои фарҳангӣ баргузор гардиданд.

Намояндагони Тоҷикистон дар чорабиниҳои гуногуни фестивал фаъолона иштирок карда, бо ҳамсолони худ аз кишварҳои ҷаҳон табодули афкор ва таҷриба намуданд. Дар раванди вохӯриҳо ҷавонони тоҷик оид ба имкониятҳои ҷавонони Тоҷикистон, ташаббусҳои онҳо дар соҳаҳои маориф, фаъолияти ҷамъиятӣ, фарҳанг ва дигар самтҳо маълумот пешниҳод намуданд.

Яке аз рӯйдодҳои муҳими фестивал раҳпаймоии байналмилалӣ буд, ки дар он намояндагони 191 кишвари ҷаҳон иштирок намуданд.

Ҷавонони тоҷик дар ин чорабинӣ бо Парчами давлатии Ҷумҳурии Тоҷикистон ва либосҳои миллӣ иштирок намуда, фарҳанг, анъана ва ҳувияти миллии тоҷиконро муаррифӣ карданд.

Иштироки ҷавонони тоҷик бо либосҳои миллӣ дар ин чорабинии байналмилалӣ таваҷҷуҳи иштирокдорони фестивалро ҷалб намуда, имконияти дигаре барои муаррифии фарҳанги миллӣ ва мероси маънавии тоҷикон фароҳам овард.

Дар доираи маъракаи таблиғотии Фестивали байналмилалии ҷавонон-2026 гулдухтари тоҷик Маҳастӣ Иброҳимзода низ ҳамчун яке аз чеҳраҳои фестивал муаррифӣ гардид.

Симои ӯ дар экранҳои шаҳри Екатеринбург дар баробари намояндагони дигар миллатҳо намоиш дода шуд. Ин иқдом аз иштироки ҷавонони Тоҷикистон дар барномаҳои иттилоотӣ ва фарҳангии фестивал ва хусусияти байналмилалии чорабинӣ дарак медиҳад.

Яке аз рӯйдодҳои муҳими дигари фестивал суханронии Диловар Бобоев дар ҳузури муовини якуми Роҳбари Дастгоҳи Президенти Федератсияи Русия Сергей Кириенко ва намояндаи расмии Вазорати корҳои хориҷии Федератсияи Русия Мария Захарова буд.

Зимни суханронӣ Диловар Бобоев имконияту иқтидори ҷавонони Тоҷикистонро муаррифӣ намуда, оид ба нақши онҳо дар рушди ҷомеа, соҳаҳои маориф, дипломатия, ҳамкориҳои касбӣ ва фаъолияти ҷамъиятӣ андешаҳои худро баён кард.

Ҳамзамон, ба нақши ҷавонон дар таҳкими ҳамдигарфаҳмӣ байни халқҳо ва рушди робитаҳои дӯстонаи Тоҷикистон ва Русия таваҷҷуҳи хос зоҳир гардид.

Дар доираи Фестивали байналмилалии ҷавонон-2026 ҷавонони Тоҷикистон инчунин шоми фарҳангии тоҷиконаро баргузор намуданд.

Дар он ба меҳмонон ва иштирокдорони фестивал фарҳанг, анъана, расму ойин ва санъати миллии тоҷикон муаррифӣ гардид. Барномаи фарҳангӣ аз суруду рақсҳои тоҷикӣ иборат буда, таваҷҷуҳи зиёди иштирокдорони хориҷиро ба худ ҷалб намуд.

Шоми фарҳангӣ ба меҳмонон имконият фароҳам овард, ки бо фарҳанги ғанӣ, суннатҳои миллӣ ва санъати тоҷикон аз наздик шинос шаванд.

Чунин чорабиниҳои фарҳангӣ дар баробари муаррифии Тоҷикистон барои таҳкими муколамаи байнифарҳангӣ, эҳтироми мутақобил ва ба роҳ мондани робитаҳои нави дӯстона байни ҷавонони кишварҳои гуногун мусоидат менамоянд.

Иштироки ҷавонони Тоҷикистон дар Фестивали байналмилалии ҷавонон-2026 имконияти мусоид барои муаррифии иқтидори зеҳнӣ ва эҷодии насли ҷавон, табодули таҷриба ва густариши робитаҳои байналмилалӣ фароҳам овард.

Ҷавонони тоҷик дар доираи чорабинӣ бо ҳамсолони худ аз кишварҳои гуногун робитаҳои нав барқарор намуда, дар муҳокимаҳои марбут ба масъалаҳои ҷавонон ва рушди ҳамкории байналмилалӣ иштирок карданд.

Дар маҷмуъ, иштироки ҳайати Тоҷикистон дар Фестивали байналмилалии ҷавонон-2026 аз фаъолият ва ташаббускории ҷавонони кишвар, омодагии онҳо ба муколамаи байналмилалӣ ва талошҳояшон барои муаррифии фарҳангу анъанаҳои миллӣ дар арсаи байналмилалӣ дарак медиҳад.

Фестивал ҳамчун майдони муҳими мубодилаи дониш ва таҷриба, муаррифии фарҳангҳои миллӣ ва таҳкими дӯстӣ ва ҳамдигарфаҳмӣ байни ҷавонони кишварҳои гуногун хизмат намуд.

Ҷавонони Тоҷикистон дар ин чорабинӣ бо муаррифии фарҳанг, арзишҳои миллӣ ва иқтидори насли ҷавон дар таҳкими робитаҳои дӯстона ва ҳамкориҳои созанда байни Тоҷикистон ва кишварҳои ҷаҳон саҳми худро гузоштанд.

АКС: АМИТ «Ховар»