Дар Душанбе ҷаласаи навбатии роҳбарони мақомоти зиддиинҳисории давлатҳои аъзои СҲШ доир гардид
ДУШАНБЕ, 17.09.2026 /АМИТ «Ховар»/. Имрӯз дар шаҳри Душанбе ҷаласаи навбатии роҳбарони мақомоти зиддиинҳисории давлатҳои аъзои Созмони ҳамкории Шанхай баргузор гардид, хабар доданд ба АМИТ «Ховар» аз Хадамоти зиддиинҳисории назди Ҳукумати Ҷумҳурии Тоҷикистон.
Зимни ифтитоҳи ҷаласа сардори Хадамоти зиддиинҳисории назди Ҳукумати Ҷумҳурии Тоҷикистон Ҳайдаралӣ Раҷабзода иброз дошт, ки «солҳои охир ҳамкории мақомоти зиддиинҳисории давлатҳои аъзои Созмони ҳамкории Шанхай ба яке аз самтҳои муҳими ҳамкории иқтисодӣ дар доираи созмон табдил ёфтааст. Ҷаласаҳои мо имконияти муколамаи касбӣ, мубодилаи таҷриба ва баррасии масъалаҳои мубрами сиёсати рақобатиро фароҳам меоранд. Дар шароити муосир таъмини рақобати одилона ва самаранок аҳаммияти хосса пайдо мекунад».
Имрӯз давлатҳои аъзои Созмони ҳамкории Шанхай дар соҳаи сиёсати рақобат бо якчанд масъалаҳои муштарак рӯ ба рӯ мебошанд. Рушди босуръати иқтисоди рақамӣ, афзоиши нақши платформаҳои рақамӣ ва тиҷорати электронӣ, аҳаммияти рӯзафзуни маълумот ҳамчун захираи иқтисодӣ ва пайдоиши моделҳои нави соҳибкорӣ тақозо менамоянд, ки сиёсати рақобат ва танзими зиддиинҳисорӣ мутобиқ ба талаботи замон пайваста такмил дода шаванд.
Таъкид гардид, ки дар Ҷумҳурии Тоҷикистон ба рушди рақобати солим ва фароҳам овардани шароити баробар барои субъектҳои бозор таваҷҷуҳи махсус зоҳир мегардад. Хадамоти зиддиинҳисории назди Ҳукумати Ҷумҳурии Тоҷикистон дар ин самт барои такмили заминаи меъёрии ҳуқуқӣ ва механизмҳои татбиқи сиёсати рақобат мунтазам фаъолият мекунад.
«Яке аз натиҷаҳои муҳими ин фаъолият таҳия ва қабули Қонуни Ҷумҳурии Тоҷикистон «Дар бораи ҳимоя ва рушди рақобат» дар таҳрири нав мебошад. Таҳрири нави қонун бо назардошти тамоюлҳои муосири рушди иқтисодиёт, таҷрибаи байналмилалӣ ва таҷрибаи пешқадам дар соҳаи ҳифзи рақобат таҳия гардидааст»,- гуфт Ҳайдаралӣ Раҷабзода.
Дар ҷаласа иброз гардид, ки дар шароити тағйирёбии босуръати иқтисоди ҷаҳонӣ ва рушди иқтисоди рақамӣ ҳамкории байналмилалӣ дар соҳаи ҳифзи рақобат аҳамияти бештар пайдо мекунад. Барои давлатҳои аъзои Созмони ҳамкории Шанхай мубодилаи таҷриба, таҷрибаи пешқадам ва маълумот дар масъалаҳои татбиқи сиёсати рақобат метавонад ба таҳияи механизмҳои самараноки ҳифзи рақобат ва вокуниш ба мушкилоти нави бозор мусоидат намояд.
Иштирокдорон иҷрои қарорҳои ҷаласаи роҳбарони мақомоти кишварҳои аъзои созмонро, ки моҳи апрели соли 2025 дар шаҳри Москва баргузор гардид, баррасӣ намуданд. Инчунин тамоюлҳои муосири рушди сиёсати рақобат ва такмили танзими зиддиинҳисорӣ, дурнамои ҳамкорӣ байни мақомоти зиддиинҳисории кишварҳои аъзои созмон, санаҳо ва макони баргузории ҷаласаи навбатӣ ва ғайраро муҳокима намуданд.
АКС: Хадамоти зиддиинҳисории назди Ҳукумати Ҷумҳурии Тоҷикистон
ИМРӮЗ-РӮЗИ ҶАҲОНИИ ПОЧТА. «Почтаи Тоҷикистон» то соли 2030 ба маркази миллии логистика ва хизматрасониҳои рақамӣ табдил меёбад
Дар Тоҷикистон беш аз 300 тонна пилла истеҳсол гардидааст
Дар Душанбе масъалаи рушди технологияҳои рақамӣ ва ҳифзи кӯдакон дар муҳити рақамӣ баррасӣ гардид
Корхонаи коркарди пахтаи ноҳияи Фархор баъд аз таъмир ба истифода дода шуд
РӮЗИ ҶАҲОНИИ ПАХТА. Як килограмм нахи пахта дар бозори ҷаҳонӣ ба 16 килограмм гандум баробар аст
«БАРНОМАИ РУШДИ САЙЁҲИИ ДОХИЛӢ». Дар Тоҷикистон беш аз 400 захираи сайёҳӣ, 1000 дара, 1000 кӯл ва мавзеъҳои дигари ҷолиб мавҷуд аст
Дурнамои рушди соҳаи сохтмони Тоҷикистон дар форуми байналмилалӣ дар Екатеринбург муаррифӣ гардид
Лоиҳаи «Дастрасӣ ба бозорҳо ва мутобиқшавӣ барои чорводорӣ» татбиқ мегардад
Дар Конфронси C5+1 SI дастовардҳои Тоҷикистон дар самти рушди зеҳни сунъӣ муаррифӣ шуданд
Коршиносони БОР соҳаи нақлиёт ва логистикаро яке аз муҳаррикони рушди иқтисодиёт арзёбӣ менамоянд
Байни Тоҷикистон ва палатаҳои савдою саноати кишварҳои ИДМ густариши робитаҳои тиҷоратӣ баррасӣ гардид
Барои фурӯши неруи барқ тавассути истгоҳҳои пуркунии воситаҳои нақлиёти барқӣ талаботи нав амалӣ гардид
