Дар Тоҷикистон содироти маҳсулот дар сатҳи устувори рушд ва афзоиш қарор гирифт

ДУШАНБЕ, 06.09.2026 /АМИТ «Ховар»/. Дар даврони соҳибистиқлолии Тоҷикистон бо таъмин гардидани бозорҳои мамлакат бо маҳсулоти кишоварзӣ ҳаҷми содироти он низ ба давлатҳои хориҷӣ бештар гардид. Соли 2025 ҳаҷми содирот ба 190,5 ҳазор тонна расида, арзиши он 79,2 миллион долларро ташкил дод.

Тавре аз Вазорати кишоварзии Ҷумҳурии Тоҷикистон ба АМИТ «Ховар» иттилоъ доданд, дар таркиби маҳсулот содироти пахта 30-35 фоиз, меваю сабзавот зиёда аз 40 фоиз, меваи хушк қариб 20 фоиз ва дигар маҳсулот — асал ва чормағз афзоиш ёфтаанд.

Имрӯз кишоварзӣ дар Тоҷикистон соҳаест, ки барои рушди иқтисодӣ, таъмини амнияти озуқаворӣ ва беҳтар гардидани некӯаҳволии мардум аҳамияти калидӣ дорад. Дастовардҳое, ки дар ин самт ба даст омадаанд, натиҷаи меҳнати деҳқонон, дастгирии давлатӣ ва истифодаи оқилонаи замин мебошанд.

Содироти маҳсулоти кишоварзӣ ба рушди иқтисодиёти мамлакат мусоидат намуда, дар таъсиси ҷойи нави кор ва ҷалби сармоя ба болоравии сатҳи зиндагии аҳолӣ таъсир мегузорад.

Таъкид гардид, ки шарикони асосӣ оид ба содирот давлатҳои Чин бо 21,1 фоиз аз ҳаҷми умумии содирот, Нидерланд – 16,3 фоиз, Швейтсария – 13,3 фоиз, Узбекистон – 11,1 фоиз, Русия – 9,7 фоиз, Туркия – 8,6 фоиз, Эрон – 4,5 фоиз, Қазоқистон – 3,4 фоиз, Белгия – 3,3 фоиз ва дигар давлатҳо мебошанд.

АКС: АМИТ «Ховар»