Дар Вилояти Мухтори Кӯҳистони Бадахшон кормандони соҳаҳои гуногун бо мукофотҳои давлатӣ қадрдонӣ шуданд
ДУШАНБЕ, 05.09.2026 /АМИТ «Ховар»/. Бахшида ба 35-солагии Истиқлоли давлатии Ҷумҳурии Тоҷикистон 4 сентябр дар Театри вилоятии мусиқӣ-мазҳакавии ба номи Меҳрубон Назаров маросими тантанавии қадршиносии кормандони касбу кори гуногун баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии Вилояти Мухтори Кӯҳистони Бадахшон хабар доданд.
Дар вазъияти тантанавӣ ба як гурӯҳ фаъолон, кормандони соҳаҳои гуногун ва шахсоне, ки дар рушди иҷтимоию иқтисодӣ, ободонӣ, пешрафти соҳаҳои ҳаётан муҳими вилоят ва таҳкими дастовардҳои даврони соҳибистиқлолӣ саҳми арзанда гузоштаанд, мукофотҳои давлатӣ, аз ҷумла медали «Хизмати шоиста», медали «35-солагии Истиқлолияти давлатии Ҷумҳурии Тоҷикистон» ва «Ифтихорномаи Ҳукумати Ҷумҳурии Тоҷикистон» супорида шуд. Аз ҷумла, Раиси марҳуми Вилояти Мухтори Кӯҳистони Бадахшон Алишер Мирзонабот барои хизматҳои шоиста ва саҳми арзанда дар пешрафту рушди вилоят бо ордени Исмоили Сомонӣ дараҷаи 2 сарфароз гардонида шуд.
Зимни маросим таъкид шуд, ки Истиқлоли давлатӣ барои Тоҷикистон имконият фароҳам овард, ки таҳти роҳбарии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон роҳи мустақили рушди сиёсӣ, иқтисодӣ ва иҷтимоиро пеш гирифта, барои таҳкими давлатдорӣ, баланд бардоштани сатҳи зиндагии мардум ва рушди устувори минтақаҳо тадбирҳои созанда амалӣ намояд.
Иброз гардид, ки дастовардҳои солҳои соҳибистиқлолӣ дар Вилояти Мухтори Кӯҳистони Бадахшон низ бо меҳнати содиқонаи сокинон, кормандони соҳаҳои гуногун, роҳбарон, мутахассисон, соҳибкорон, омӯзгорон, табибон, фарҳангиён, кормандони мақомоти давлатӣ ва дигар намояндагони ҷомеа пайванди ногусастанӣ доранд.
Дар ин замина, қадрдонии шахсони фаъол дар арафаи ҷашни 35-солагии Истиқлоли давлатӣ нишони эҳтиром ба хизматҳои шоистаи онҳо ва ҳавасмандӣ барои идомаи фаъолияти созанда арзёбӣ гардид.
Маросими тантанавӣ бо таъкиди нақши Истиқлоли давлатӣ дар таъмини сулҳу субот, ваҳдати миллӣ ва фароҳам овардани заминаҳои мусоид барои рушди устувори мамлакат идома ёфт.
АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон
Конференсияи илмӣ оид ба саҳми экспедитсияи бостоншиносӣ дар омӯзиши Панҷакенти қадим баргузор мегардад
Дар шаҳри Ҳисор мумфаршкунии беш аз 3,5 километр роҳи автомобилгард оғоз гардид
Рӯзи дарҳои кушоди Академияи хурди илмҳои Тоҷикистон баргузор шуд
820 иншооти гуногун ба маблағи беш аз 1 миллиард сомонӣ дар шаҳри Ваҳдат ба истифода дода шуд
ТАРЗИ ҲАЁТИ СОЛИМ. Камҳаракатӣ барои пайдоиши бемориҳои гуногун замина фароҳам меорад
Дар шаҳри Конибодом нуқтаҳои истироҳатӣ ва осоишгоҳи солимгардонӣ бунёд карда мешаванд
Шахсони дорои масунияти заиф бештар ба зуком гирифтор мешаванд
Дар ноҳияи Шаҳристон ба беҳтар намудани сатҳу сифати таълиму тарбия таваҷҷуҳи хосса дода мешавад
Дар шаҳри Ҳисор бинои мактаб, варзишгоҳ ва коргоҳи дӯзандагӣ ба истифода дода шуд
СОЛИ ОБОДОНИЮ БУНЁДКОРӢ. 100 хоҷагии деҳаи Зарнисор-1-и ноҳияи Рӯдакӣ бо оби тозаи ошомиданӣ таъмин гардид
Дар даврони соҳибистиқлолӣ дар шаҳри Кӯлоб 53 бинои муассисаи таълимӣ ба истифода дода шуд
Шаҳри Душанбе соҳиби Шоҳҷоизаи Озмуни ҷумҳуриявии «Бонувони муваффақи шаҳру ноҳияҳои Тоҷикистон» гардид
