Таҳти ҳамоҳангсозии Тоҷикистон ҷаласаи сафирони Гурӯҳи кишварҳои рӯ ба тараққии маҳсур дар хушкӣ доир гардид

ДУШАНБЕ, 25.09.2026 /АМИТ «Ховар»/. Таҳти ҳамоҳангсозии Ҷумҳурии Тоҷикистон нахустин ҷаласаи сатҳи сафирони Гурӯҳи кишварҳои рӯ ба тараққии маҳсур (КРТМХ) дар хушкӣ (LLDC) баргузор гардид.

Тавре ба АМИТ «Ховар» аз Сафорати Ҷумҳурии Тоҷикистон дар Конфедератсияи Швейтсария хабар доданд, дар ҷаласа кишварҳои аъзо, созмонҳои байналмилалӣ иштирок карда, масъалаҳои марбут ба сиёсати савдо, низомҳои транзитӣ, рушди инфрасохтор, пайвастагии минтақавӣ ва татбиқи барномаҳои махсуси марбута, инчунин дигар самтҳои афзалиятноки фаъолияти гурӯҳро баррасӣ карданд. Ҳамзамон аз ҷониби Созмони умумиҷаҳонии савдо лоиҳаи палтформаи долонҳои транзитӣ муаррифӣ гардида, мубодилаи афкор доир шуд.

Ҷумҳурии Тоҷикистон, ки аз 1 июли соли 2026 ба муҳлати як сол ҳамчун ҳамоҳангсози Гурӯҳи кишварҳои рӯ ба тараққии маҳсур интихоб гардидааст, дар доираи ҳамоҳангсозӣ ба таҳкими ҳамкории байни кишварҳои аъзо ва пешбурди манфиатҳои муштараки кишварҳои рӯ ба тараққии маҳсур дар хушкӣ мусоидат менамояд.

АКС: Сафорати Ҷумҳурии Тоҷикистон дар Конфедератсияи Швейтсария