Тоҷикистон ва Хазинаи байналмилалии асъор ҳамкориро дар соҳаи саноат тақвият медиҳанд

ДУШАНБЕ, 01.09.2026 /АМИТ «Ховар»/. Дурнамои рушди саноат ва самтҳои минбаъдаи ҳамкорӣ байни Ҷумҳурии Тоҷикистон ва Хазинаи байналмилалии асъор (ХБА) дар мулоқоти Вазири саноат ва технологияҳои нави Ҷумҳурии Тоҷикистон Шералӣ Кабир бо Намояндаи доимии Хазинаи байналмилалии асъор дар Тоҷикистон Ғозӣ Шбайкат баррасӣ гардид.

АМИТ «Ховар» бо истинод ба Вазорати саноат ва технологияҳои нави Ҷумҳурии Тоҷикистон иттилоъ медиҳад, ки ҷонибҳо вазъи имрӯзаи иқтисодиёти миллӣ, дурнамои рушди саноат ва самтҳои минбаъдаи ҳамкориро муҳокима намуданд.

Бо дахли дастгирии созанда ва ҳамкории дарозмуддат дар татбиқи ислоҳоти иқтисодӣ ва рушди Ҷумҳурии Тоҷикистон вазир афзуд, ки иқтисодиёти миллӣ рушди устувори мусбатро нишон дода, бахши саноат ҳамчун яке аз омилҳои асосии рушд мавқеи худро нигоҳ медорад.

Марҳилаи якуми Стратегияи миллии саноатикунонӣ муваффақона ба анҷом расонида шуд ва татбиқи марҳилаи дуюми он, ки ба таҷдиди иқтидори истеҳсолӣ ва тавсеаи иқтидори содиротии кишвар нигаронида шудааст, оғоз гардид.

Бахши саноати Тоҷикистон сарфи назар аз мушкилоти мавҷуда – тарифҳои баланди энергетикӣ, маҳдудияти сӯзишворӣ ва мураккабиҳои логистикӣ устувории худро нигоҳ медорад. Он ҳамзамон самтҳои нави рушдро, аз ҷумла дар соҳаҳои саноати сабук, рақамикунонӣ ва зеҳни сунъӣ фаъолона ба роҳ мемонад.

Ҷонибҳо барои густариши ҳамкории созанда, пеш аз ҳама, дар соҳаи омода намудани мутахассисон, рушди институтсионалӣ ва тақвияти иқтидор изҳори омодагӣ намуданд.

Хазинаи байналмилалии асъор омодагии худро барои идомаи мусоидат ба Тоҷикистон дар татбиқи барномаи дарозмуддати рушди устувори иқтисодӣ тасдиқ намуд.

АКС: Вазорати саноат ва технологияҳои нави Ҷумҳурии Тоҷикистон