Вазири корҳои хориҷии Тоҷикистон дар якчанд чорабинии сатҳи баланд дар Ню-Йорк иштирок намуд

ДУШАНБЕ, 25.09.2026 /АМИТ «Ховар»/. 24 сентябр дар шаҳри Ню-Йорк дар доираи иҷлосияи 81-уми Маҷмаи умумии Созмони Милали Муттаҳид Вазири корҳои хориҷии Ҷумҳурии Тоҷикистон Сироҷиддин Муҳриддин бо Вазири корҳои хориҷии Ҳиндустон мулоқот карда, дар чорабинии сатҳи баланд иштирок намуд.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, дар мулоқоти вазирони корҳои хориҷии Тоҷикистон ва Ҳиндустон Сироҷиддин Муҳриддин ва Субраҳманям Ҷайшанкар доираи васеи масоили муносибатҳои Тоҷикистону Ҳиндустонро мавриди баррасӣ қарор доданд. Дар ин замина рушди ҳамкории пойдори ду мамлакат дар соҳаҳои сиёсӣ, тиҷоративу иқтисодӣ ва фарҳангиву гуманитарӣ таъкид гардид.

Ҷонибҳо инчунин атрофи ҳамкории ду мамлакат дар чаҳорчӯби созмонҳои байналмилалию минтақавӣ мубодилаи афкор намуданд.

Ҳамчунин 24 сентябр дар шаҳри Ню-Йорк ҷаласаи сатҳи баланди кишварҳои рӯ ба рушди маҳсур дар хушкӣ баргузор гардид, ки дар он Сироҷиддин Муҳриддин иштирок намуд.

Сироҷиддин Муҳриддин аҳаммияти таҳкими ҳамкории байналмилалӣ, рушди инфрасохтор ва пайвастагии нақлиётиро барои рушди устувори кишварҳои рӯ ба рушди маҳсур дар хушкӣ таъкид кард.

Ҳамчунин роҳбари ҳайати Тоҷикистон ба таъсири тағйирёбии иқлим, обшавии босуръати пиряхҳо ва мушкилоти обу энергетика таваҷҷуҳи махсус зоҳир намуда, зарурати ҷалби маблағгузории бештарро дар ин самт муҳим арзёбӣ кард.

Дар ҳамин рӯз дар доираи иҷлосияи 81-уми Маҷмаи Умумии Созмони Милали Муттаҳид Вазири корҳои хориҷии Ҷумҳурии Тоҷикистон дар ҷаласаи вазирони корҳои хориҷии кишварҳои аъзои Созмони ҳамкории исломӣ (СҲИ) иштирок кард.

Зимни суханронӣ Сироҷиддин Муҳриддин мавқеи Тоҷикистонро дар иртибот ба масъалаҳои мубрами рӯзномаи байналмилалӣ ва минтақавӣ, таҳкими ҳамкории кишварҳои аъзои Созмони ҳамкории исломӣ ва ҳалли масъалаҳои мавриди таваҷҷуҳи муштарак ифода намуд.

Аз ҷумла, масъалаҳои марбут ба муҳити зист ва ҳамкории байналмилалӣ дар самти ҳифзи пиряхҳо ва захираҳои об, ба хусус ташаббусҳои Тоҷикистон дар ин росто таъкид шуданд.

Ҳамзамон зимни нишаст масъалаҳои таҳкими ҳамбастагӣ ва ҳамкории кишварҳои аъзои Созмони ҳамкории исломӣ, ҳифзи сулҳу субот, рушди ҳамкории иқтисодию гуманитарӣ ва дигар мавзуоти муҳими байналмилалӣ баррасӣ гардиданд.

Дар ин иртибот, ташаббуси нави Ҷумҳурии Тоҷикистон оид ба Даҳсолаи байналмилалии таҳкими сулҳ барои наслҳои оянда барои солҳои 2027–2036 ва қатъномаи дахлдори Созмони Милали Муттаҳид дар ин маврид таъкид шуд.

АКС: Вазорати корҳои хориҷии Тоҷикистон