Вохӯрии роҳбарони гурӯҳҳои дӯстии байнипарлумонии Ҷумҳурии Тоҷикистон ва Давлати Қатар доир шуд

ДУШАНБЕ, 25.09.2026 /АМИТ «Ховар»/. 25 сентябр дар доираи ҷаласаи Кумитаи доимии Ассамблеяи парлумонии Осиё оид ба масъалаҳои иҷтимоӣ ва фарҳангӣ дар шаҳри Душанбе вохӯрии роҳбарони гурӯҳҳои дӯстии байнипарлумонии Ҷумҳурии Тоҷикистон ва Давлати Қатар баргузор гардид. Дар ин хусус ба АМИТ «Ховар» аз Маҷлиси намояндагон хабар доданд.

Зимни вохӯрӣ ҷонибҳо вазъи кунунӣ ва дурнамои рушди муносибатҳои дӯстона ва ҳамкории байнипарлумонии Тоҷикистону Қатарро мавриди баррасӣ қарор доданд. Иброз гардид, ки робитаҳои Тоҷикистону Қатар бар пояи эҳтироми мутақобил ва манфиатҳои муштарак рушд ёфта, солҳои охир ҳамкории ду кишвар дар соҳаҳои сиёсӣ, иқтисодию тиҷоратӣ, сармоягузорӣ, фарҳанг, маориф ва сайёҳӣ густариш ёфтаанд.

Ҷонибҳо нақши муҳими дипломатияи парламентӣ ва гурӯҳҳои дӯстиро дар таҳкими робитаҳои байни ду кишвар таъкид намуда, зарурати идомаи табодули таҷриба, баргузории вохӯриҳои байнипарлумонӣ ва ҳамкории муштарак дар доираи созмонҳои байналмилалӣ ва минтақавиро баён карданд.

Ҳамчунин масъалаҳои рушди ҳамкории иҷтимоӣ ва фарҳангӣ, таҳкими робитаҳо байни ҷавонон, занон ва ниҳодҳои ҷомеаи шаҳрвандӣ, инчунин истифодаи имконияти мавҷуда барои табодули таҷрибаи қонунгузорӣ мавриди таваҷҷуҳ қарор гирифтанд.

Дар фарҷоми мулоқот ҷонибҳо барои идомаи ҳамкории судманд ва таҳкими робитаҳои дӯстона байни парламентҳои Ҷумҳурии Тоҷикистон ва Давлати Қатар изҳори омодагӣ намуданд.

Вохӯрӣ дар фазои дӯстӣ, ҳамдигарфаҳмӣ ва эҳтироми мутақобил баргузор гардид.

АКС: Маҷлиси намояндагони Маҷлиси Олии Ҷумҳурии Тоҷикистон