Дар ноҳияи Бобоҷон Ғафуров ду зеристгоҳи барқӣ ба истифода дода шуд

Октябрь 25, 2026 09:30

ДУШАНБЕ, 25.10.2026 /АМИТ «Ховар»/. Бо мақсади беҳтар намудани таъминоти сокинон бо неруи барқ ва баланд бардоштани сифати интиқоли он дар ноҳияи Бобоҷон Ғафуров ду зеристгоҳи барқӣ ба истифода дода шуд. Дар ин хусус АМИТ «Ховар» бо истинод ба хадамоти матбуоти Раиси вилояти Суғд иттилоъ медиҳад.

Зеристгоҳи барқии «Арбоб» бо шиддати 110/35/6 киловолт дар ҳудуди Ҷамоати деҳоти Унҷӣ бунёд гардида, ба коҳиш додани сарбории зеристгоҳҳои барқии Рӯмон, Унҷӣ, Ленинобод ва Ситора мусоидат менамояд. Барои бунёди иншоот хати интиқоли барқ ба масофаи 12 километр кашида шуда, дастгоҳу таҷҳизоти муосир васлу насб гардидаанд.

Тибқи таҳлилҳои мутахассисон, ба истифода додани зеристгоҳ имкон медиҳад, ки талафоти неруи барқ аз 16 то 7 фоиз коҳиш ёфта, шиддати барқ дар шабака аз 120–130 волти кунунӣ то ба 220 волт расонида шавад. Ҳамзамон иншооти мазкур барои коҳиш додани садамаҳои шабакаи барқӣ дар фасли сармо заминаи мусоид фароҳам меорад.

Иброз гардид, ки таъмини истиқлолияти энергетикӣ яке аз ҳадафҳои стратегии Ҳукумати Ҷумҳурии Тоҷикистон буда, дар ин самт татбиқи лоиҳаҳо идома дорад. Бо дастгирӣ ва таваҷҷуҳи доимии Президенти Ҷумҳурии Тоҷикистон муҳтарам Эмомалӣ Раҳмон дар солҳои соҳибистиқлолӣ дар мамлакат даҳҳо неругоҳи хурду бузург бунёд ва ба истифода дода шуда, иқтидори энергетикии мамлакат афзоиш ёфтааст.

Ёдовар мешавем, ки соли 2026 дар ноҳияи Ашти вилояти Суғд неругоҳи барқи офтобӣ бо иқтидори 200 мегаватт ба истифода дода шуда, тибқи нақша бунёди боз ду неругоҳи дигари офтобӣ пешбинӣ гардидааст. Инчунин дар Ҷамоати деҳоти Ёва зеристгоҳи барқии «Ёва» бо шиддати 110/35/6 киловолт мавриди истифода қарор гирифт.

Ба иттилои масъулон, фаъолияти зеристгоҳи мазкур ба кам кардани сарбории зеристгоҳҳои барқии Ғозиён, Ҷанубӣ ва Абуалӣ ибни Сино мусоидат намуда, сифати интиқоли неруи барқро беҳтар мегардонад. Тибқи таҳлилҳо, дар натиҷаи ба истифода додани он талафоти неруи барқ аз 34 то 14 фоиз коҳиш ёфта, имкони ба меъёри 220 волт расонидани шиддатнокии барқ фароҳам меояд. Дар ин иншоот низ таҷҳизоти муосир насбу васл гардида, хати интиқоли барқ бунёд шудааст. Ба истифода додани зеристгоҳҳои нав ба коҳиш додани садамаҳои барқӣ дар фасли сармо мусоидат мекунад.

Бояд гуфт, ки дар баробари бунёди зеристгоҳҳо ва таҷдиди шабакаҳои интиқоли барқ сохтмони Неругоҳи барқи обии «Роғун» идома дорад. Дар вилояти Суғд низ иқтидори мавҷудаи энергетикӣ, аз ҷумла Неругоҳи барқи обии «Қайроққум» таҷдиду навсозӣ шудаанд.

Ба истифода додани зеристгоҳҳои нави барқӣ қадами муҳим дар самти беҳтар намудани таъминоти аҳолӣ бо неруи барқ, баланд бардоштани сифати хизматрасонӣ ва коҳиш додани талафоти неруи барқ мебошад.

АКС: Хадамоти матбуоти Раиси вилояти Суғд

 

Октябрь 25, 2026 09:30

Хабарҳои дигари ин бахш

Барои рушди соҳаи боғу токпарварӣ — барномаи чоруми давлатӣ татбиқ мегардад
«БАРНОМАИ МИЁНАМУҲЛАТИ РУШДИ ИҚТИСОДИ РАҚАМӢ».Мутахассис ин мавзуъро шарҳ медиҳад
ТИҶОРАТИ РАҚАМӢ. Он ба густариши фаъолияти соҳибкорӣ ва баланд бардоштани рақобатпазирии иқтисоди миллӣ мусоидат менамояд
МАСЛИҲАТИ МУТАХАССИС. Барои ҳифзи боғҳо корҳои агротехникии тирамоҳӣ аҳамияти муҳим доранд
Истгоҳи обуҳавосанҷии Горбунов дар пиряхи «Тоҷикистон» навсозӣ карда мешавад
ҚАТЪНОМАИ ТАЪРИХӢ БАРОИ ОСИЁИ МАРКАЗӢ. Чӣ гуна ташаббуси Президенти Тоҷикистон зеҳни сунъиро ба рӯзномаи Маҷмаи Умумии СММ ворид кард
Ба бунёди боғҳои интенсивӣ ва суперинтенсивӣ таваҷҷуҳро бештар намоем. Шарҳи коршинос
Ҳаҷми маблағгузории Фонди иқлими сабз барои Тоҷикистон ба 235 миллион доллар расидааст
Ҷаласаи навбатии Гурӯҳи кории байниидоравӣ оид ба мониторинг ва арзёбии ҳуҷҷатҳои банақшагирии стратегӣ доир шуд
«БАРНОМАИ ДАВЛАТИИ РУШДИ МАЪРИФАТ ВА ФАРҲАНГИ ЭКОЛОГӢ». Он ба баланд бардоштани фарҳанги экологии аҳолӣ равона шудааст
Тоҷикистон дар COP31 таъсиси платформаи минтақавии инноватсияҳои «сабз»-ро дар Осиёи Марказӣ пешниҳод намуд
Директори Агентии авиатсияи гражданӣ Ҳабибулло Назарзода дар Ассамблеяи 43-юми ИКАО дар шаҳри Монреали Канада иштирок намуд