Дар вилояти Суғд Парки саноатии металлургияи ранга таъсис дода мешавад

ДУШАНБЕ, 21.10.2026 /АМИТ «Ховар»/. Дар  вилояти Суғд Парки саноатии металлургияи ранга таъсис дода мешавад, иттилоъ медиҳад АМИТ «Ховар» бо истинод ба Вазорати саноат ва технологияҳои нави Ҷумҳурии Тоҷикистон.

Дар иртибот  ба ин байни Вазорати саноат ва технологияҳои нави Ҷумҳурии Тоҷикистон, Ассотсиатсияи саноати металлҳои рангаи Чин ва ширкати «Тибет — Эверест» Ёддошти тафоҳум оид ба ҳамкорӣ барои таъсиси парки саноатии металлургияи ранга дар вилояти Суғд ба имзо расид.

Санад дар доираи сафари Сарвазири Шурои давлатии Ҷумҳурии Мардумии Чин ба Ҷумҳурии Тоҷикистон имзо шуд.

Ҳамкорӣ ба рушди коркарди амиқи ашёи хоми маъданӣ, истеҳсоли маҳсулоти дорои арзиши баланди иловашуда, маҳаллигардонии истеҳсолот, таъсиси ҷойи нави кор ва тавсеаи иқтидори содиротии кишвар равона гардидааст.

Татбиқи ин ташаббус ба ноил шудан ба ҳадафи стратегии саноатикунонии босуръати Ҷумҳурии Тоҷикистон мусоидат хоҳад кард.

Имзои ёддошти тафоҳум қадами муҳим дар самти татбиқи тавофуқҳои сарони ду давлат, таҳкими ҳамкории саноатию сармоягузорӣ ва мусоидат ба саноатикунонии босуръати кишвар арзёбӣ мегардад. Ин санад самтҳои асосии ҳамкорӣ, рушди коркарди амиқи ашёи хоми маъданӣ, истеҳсоли маҳсулоти дорои арзиши баланди иловашуда, маҳаллигардонии истеҳсолот ва тавсеаи иқтидори содиротиро дар бар мегирад.

      АКС: Вазорати саноат ва технологияҳои нави Ҷумҳурии Тоҷикистон