КОДЕКСИ ЭКОЛОГӢ. Ин санад бо мақсади истифодаи оқилонаи захираҳои табиӣ ва ҳифзи муҳити зист қабул гардид

ДУШАНБЕ, 22.10.2026 /АМИТ «Ховар»/.  21 октябр Президенти Ҷумҳурии Тоҷикистон муҳтарам  Эмомалӣ Раҳмон ба Кодекси экологии Ҷумҳурии Тоҷикистон, ки қаблан аз ҷониби Маҷлиси намояндагон ва Маҷлиси миллии Маҷлиси Олии Ҷумҳурии Тоҷикистон қабул ва ҷонибдорӣ гардида буд, имзо гузоштанд, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Кодекси экологӣ ба такмили заминаи ҳуқуқии ҳифзи муҳити зист, истифодаи оқилонаи захираҳои табиӣ ва таъмини амнияти экологӣ равона гардидааст.

Қабули ин санад барои ҳамоҳангсозии муносибатҳои ҳуқуқӣ дар соҳаи экология ва муайян намудани асосҳои танзими фаъолияти ба ҳифзи табиат вобаста аҳаммияти муҳим дорад.

Масъалаҳои пешгирии ифлосшавии муҳити зист, ҳифзи захираҳои обу замин, нигоҳдории гуногунии биологӣ ва истифодаи самараноки сарватҳои табиӣ аз самтҳои муҳими рушди қонунгузории экологӣ  мебошанд.

Дар шароити тағйирёбии иқлим ва афзоиши таъсири фаъолияти инсон ба муҳити зист такмили механизмҳои ҳуқуқии ҳифзи табиат ва баланд бардоштани масъулияти истифодабарандагони захираҳои табиӣ аҳаммияти бештар пайдо мекунад.

Татбиқи муқаррароти Кодекси экологӣ ва риояи талаботи қонунгузорӣ он метавонад ба беҳтар гардидани низоми ҳифзи муҳити зист, таҳкими назорати экологӣ ва баланд бардоштани маърифати экологии аҳолӣ мусоидат намояд.

     АКС: Кумитаи ҳифзи муҳити зисти назди Ҳукумати Ҷумҳурии Тоҷикистон