Ба Қонун «Дар бораи кино» тағйиру иловаҳо ворид гардиданд

Апрель 29, 2020 13:31

ДУШАНБЕ, 29.04.2020. /АМИТ «Ховар»/.  Ба Қонуни Ҷумҳурии Тоҷикистон «Дар бораи кино» тағйиру иловаҳо ворид гардиданд, ки мақомоти масъулро барои пеш аз пахш ё намоиши кино огоҳ намудани тамошобинон оид ба таснифбандии синнусолӣ вазифадор менамояд.  

Дар ин хусус вакилони мардумӣ имрӯз зимни ҷаласаи навбатии Маҷлиси намояндагони Маҷлиси Олии Ҷумҳурии Тоҷикистон, даъвати шашум таҳти раёсати Раиси Маҷлиси намояндагон Маҳмадтоир Зокирзода дар Душанбе қарор қабул намуданд.

Тавре хабарнигори АМИТ «Ховар» иттилоъ медиҳад, лоиҳаи Қонуни Ҷумҳурии Тоҷикистон «Оид ба ворид намудани тағйироту илова ба Қонуни Ҷумҳурии Тоҷикистон «Дар бораи кино» аз ҷониби вакилони Маҷлиси намояндагони Маҷлиси Олӣ, даъвати панҷум (солҳои 2015-2020) пешниҳод гардидааст.

Муовини Раиси кумитаи Маҷлиси намояндагон оид ба корҳои байналмилалӣ, иттиҳодияҳои ҷамъиятӣ ва иттилоот Бахтовар Сафарзода зимни шарҳи масъалаи мазкур иттилоъ дод, ки лоиҳа бо мақсади такмили қонунгузорӣ пешниҳод шудааст.

Тибқи тағйироти воридгардида, мақоми ваколатдори давлатӣ дар соҳаи кино вазифадор мегарданд, ки вобаста ба синну сол ба воситаҳои пахшкунандаи кино – филмҳо ва намоиши онҳо таснифбандӣ муқаррар намоянд.

«Сухан сари он меравад, ки пеш аз пахш ё намоиши кино масъулин бинандаро бояд огоҳ карда, аломатҳои +0, +6, +12, +16 ва +18-ро мувофиқ ба таснифбандии синнусолӣ, ки ба стандартҳои байналмилалии намоиши кино мувофиқат мекунад, гузоранд»,- афзуд Бахтовар Сафарзода.

Ба гуфтаи ин вакили мардумӣ, пас аз қабул шудани қонуни мазкур субъектони алоҳида, ки оид ба намоиш ва пахши кино дар мамлакат  ваколатдор мебошанд, уҳдадор мешаванд, ки ё дар ноқили интиқолдиҳандаи кинову филмҳо ва ё ҳангоми пахши онҳо дар як гӯшаи эфир ин аломатҳоро нишон диҳанд.

Дар лоиҳаи муҳокимашуда якчанд тағйироти дорои хусусияти услубӣ, матнӣ ва имлоӣ пешбинӣ шудаанд, ки дар маҷмӯъ ба баланд шудани сифати қонуни мазкур ва мутобиқкунонии он ба қонунгузории соҳавӣ мусоидат менамояд.

Бо назардошти ин бо овоздиҳии аксарияти вакилони мардумӣ лоиҳаи қонуни муҳокимагардида қабул гардид. Пас аз гузаштан аз марҳилаҳои дигари қонунгузорӣ ва нашр шудан дар матбуоти расмӣ он мавриди амал қарор мегирад.

Қонуни Ҷумҳурии Тоҷикистон «Дар бораи кино», ки соли 2004 қабул гардида буд, асосҳои ташкилӣ, ҳуқуқӣ, иҷтимоию иқтисодии соҳаи киноро муқаррар ва принсипу тадбирҳои татбиқи сиёсати давлатро дар рушди ин соҳа муайян менамояд. Қонуни мазкур аз 5 боб ва 18 модда иборат мебошад.

Апрель 29, 2020 13:31

Хабарҳои дигари ин бахш

Шӯрои Маҷлиси намояндагон лоиҳаи қонун «Дар бораи муқовимат ба коррупсия»-ро баррасӣ намуд
Вакилони Маҷлиси намояндагон лоиҳаи Қонуни Ҷумҳурии Тоҷикистон «Дар бораи фаъолияти баҳодиҳӣ»-ро баррасӣ намуданд
ПАЙРАВӢ БА ТАШАББУСИ ПЕШВОИ МИЛЛАТ. Вакили Маҷлиси намояндагон ба беморхонаи сироятии шаҳри Ҳисор кӯмак намуд
«НАВМЕД НАБОЯД ШУДАН АЗ ГАРДИШИ АЙЁМ…». Муроҷиати вакили Маҷлиси намояндагони Маҷлиси Олии мамлакат Гавҳар Шарофзода
Вакили Маҷлиси намояндагон Гулбаҳор Назирӣ: «Ҳар як рӯйдоди ҳаёт барои инсон панду андарз аст»
Толибхон Азимзода намояндаи Маҷлиси намояндагон дар Суди конститутсионӣ интихоб гардид
ПИЛЛАПАРВАРӢ. Дар Тоҷикистон барои воридоти тухми хушсифати кирмак имтиёзи андозиву гумрукӣ ҷорӣ карда мешавад
Дар Маҷлиси намояндагон оид ба пешгирии сироятёбӣ ба пандемияи COVID-19 ҳамоиш баргузор гардид
Барои бо барқ таъмин кардани 61 деҳаи дурдастарини Бадахшон лоиҳаи нав татбиқ мегардад
ПЕШВОИ МИЛЛАТ- БУНЁДГУЗОРИ МАКТАБИ БЕНАЗИРИ ТАРБИЯИ ФАРЗАНД. Раиси тозаинтихоби Маҷлиси миллӣ дастпарвари ин мактаб буда, комёб гардиданаш дар ин маснад далели бебаҳс аст
74 деҳаи вилояти Хатлон бо хизматрасонии барқи доимӣ ва аз лиҳози экологӣ тоза таъмин карда мешаванд
Вазорати молия дар ҳаҷми 300 миллион сомонӣ қоғазҳои қиматноки давлатиро ба муомилот мебарорад

Маводҳои таҳлилӣ