Саҳм ва хизматҳои Баҳром Сироҷов дар рушди соҳаи энергетикаи Тоҷикистон назаррас аст

ДУШАНБЕ, 03.03.2025 /АМИТ «Ховар»/. Баҳром Сироҷов аз собиқ роҳбарони муваффақи низоми энергетикии Тоҷикистон ба ҳисоб меравад. Хизматҳои шоистаи Баҳром Сироҷов дар рушди соҳаи энергетикаи Тоҷикистон назаррас мебошанд. Баҳром Сироҷов дар ширкати «Барқи тоҷик» 38 сол фаъолият намуда, муддати 17 сол роҳбарии ин ниҳоди энергетикии Тоҷикистонро ба уҳда дошт.

Баҳром Сироҷов ҳамчун мутахассиси соҳаи энергетика на танҳо дар Тоҷикистон машҳур аст, балки ӯро энергетикҳои тамоми кишварҳои аъзои Иттиҳоди Давлатҳои Мустақил мешиносанд ва эҳтиром менамоянд. Далели ин унвонҳои фахрии «Аълочии энергетика ва электриконии СССР» (1967), «Аълочии корхонаи «Барқи тоҷик», собиқадори энергетикии Русия (1995) ва «Энергетики фахрии Украина» (2010) мебошанд.

Баҳром Сироҷов мактаби миёнаро бо баҳои хубу аъло хонда, соли 1957 мактабро бо медали нуқра хатм намудааст. Соли 1963 Институти муҳандисии Ленинградро аз рӯи ихтисоси техникаи баландшиддат хатм намуда, баъди бозгашт ба Тоҷикистон фаъолияти меҳнатиашро ба ҳайси лаборанти калони Академияи илмҳои ҶШС Тоҷикистон оғоз намудааст. Баъд ба кори истеҳсолӣ гузашта, солҳои 1963—1965 сармуҳандиси Корхонаи шабакаҳои электрикии Ҷанубӣ (Қурғонтеппа) ва дар як вақт ҳамзамон ба кори илмӣ машғул шудааст. Моҳи майи соли 1965 бо Қарори Ҳукумати ҶШС Тоҷикистон Баҳром Сироҷев муовини сардори Сарраёсати энергетика ва электрификатсияи ҶШС Тоҷикистон таъйин карда шуд. Соли 1976, вақте ки дар вазифаи муовини сардори «Тоҷикглавэнерго» фаъолият менамуд, дар шаҳри Москва рисолаи номзадӣ ҳимоя намуд. Баҳром Сироҷов хатмкардаи Академияи хоҷагии халқи назди Шурои вазирони собиқ ИҶШС дар Маскав (солҳои 1981-1983) мебошад. Баъди хатми Академияи хоҷагии халқ дар соли 1983 Баҳром Сироҷов бо шарофати комёбиҳои истеҳсолӣ ва илмӣ, дониш ва маҳорати кордониаш бо даъвати Вазорати энергетика ва электрификатсияи ИҶШС ба вазифаи сардори Раёсати «Тоҷикглавэнерго» таъйин шуд. Баъдан «Тоҷикглавэнерго» ба Ҷамъияти саҳомии холдингии ширкати «Барқи тоҷик» табдил дода шуд ва аз соли 1993 то соли 2001, яъне то ба нафақа баромадан Баҳром Сироҷов роҳбари «Барқи Тоҷик» буд.

Баҳром Сироҷов солҳои 1987-1990 ва 1990-1995 вакили Шурои Олии Тоҷикистон интихоб шудааст. Вакили мардумии Ҷумҳурии Тоҷикистон, иштирокчии иҷлосияи таърихии XVI Шурои Олии Ҷумҳурии Тоҷикистон мебошад. Баҳром Сироҷов ҳамчун роҳбар ба ҳар мушкилот аз нуқтаи назари илмӣ-истеҳсолӣ муносибат менамуд. Ӯ ҳам роҳбар ва ҳам олим буд. Ин аст, ки муаллифи зиёда аз 40 мақолаи илмӣ мебошад. Солҳои 1984—1988 ба сохтмону ба истифода додани Неругоҳи барқи обии «Бойғозӣ» ва инчунин таъмири техникӣ ва таҷдиди агрегатҳои Неругоҳи барқи обии «Норак» роҳбарӣ намудааст. Дар давраи роҳбарии ӯ иқтидори низоми энергетикии Тоҷикистон 26 фоиз, сохтмони хатҳои интиқоли барқ ва зеристгоҳҳои барқӣ 40 фоиз афзуд. Дар ин солҳо сохтмони Неругоҳи барқи обии «Роғун» оғоз ёфта, бунёди шаҳри Роғун қариб ба охир расид.

Баҳром Сироҷов дар масъалаи истифодаи самараноки захира ва иқтидори гидроэнергетикии Тоҷикистон пайваста ғамхорӣ ва андеша мекард. Ин аст, ки соли 1985 бо пешниҳоди ӯ дар марҳилаи лоиҳакашӣ ва тарҳрезӣ неругоҳи «Сангтӯда» ба Неругоҳи барқи обии «Сангтӯда-1» ва Неругоҳи барқи обии «Сангтӯда-2» тақсим карда шуд. Ин имкон дод, ки заминҳои кораму киштбоб ва деҳаи Сангтӯда ва дигар нуқтаҳои аҳолинишини наздик ба он зери об намонанд. Солҳои роҳбарии Баҳром Сироҷов барои рушду пешрафти соҳаи гидроэнергетикаи Тоҷикистон солҳои пурсамар буданд, зеро Баҳром Сироҷов низоми энергетикии Тоҷикистонро ба яке аз пешрафтатарин соҳаҳои иқтисодиёт дар фазои собиқ шӯравӣ табдил дода буд.

Шуруъ аз сохтмони Неругоҳи барқи обии « Норак », баъдтар дар натиҷаи роҳбарии дурандешонаи Баҳром Сироҷов дар низоми энергетикии Тоҷикистон энергетикҳо ва мутахассисони соҳибихтисосу ботаҷриба пайдо шуданд. Аксари мутахассисони низоми энергетикии Тоҷикистон Баҳром Сироҷовро устоди худ медонанд. Хизматҳои ин марди меҳнатдӯст дар сатҳи байналмилалӣ ҳам қадрдонӣ шуданд. 30 октябри соли 2000 дар конфронси 25-уми байналмилалӣ дар Женева Ҷамъияти саҳомии холдингии кушодаи ширкати «Барқи тоҷик» бо ҷоизаи олӣ – «Ситораи тиллоӣ барои сифат ва афзалият» сарфароз гардонида шуд.

Баҳром Сироҷов номзади илмҳои техникӣ буда, аз соли 1991 узви вобаста ва аз соли 1992 академики Академияи муҳандисии байналмилалии Москва, аз соли 1993 академики Академияи муҳандисии Ҷумҳурии Тоҷикистон ва аъзои Раёсати Академияи муҳандисии Ҷумҳурии Тоҷикистон мебошад. Соли 2019 Академияи байналмилалии муҳандисӣ Баҳром Сироҷовро бо Нишони сарисинагии «Шуҷоати муҳандисӣ» мукофотонид. Баҳром Сироҷов яке аз муассисони Ассотсиатсияи энергетикҳои Тоҷикистон ва раиси фахрии он мебошад. Аз соли 1998 Корманди шоистаи Ҷумҳурии Тоҷикистон мебошад.

Баҳром Сироҷов ҳоло дар нафақа қарор дошта, аз соҳаи энергетика дур нест. Ӯ ҳамчун олим дар чорабиниҳои зиёди илмӣ иштирок намуда, ба ҳайси сармушовири Гурӯҳи татбиқи лоиҳаҳои энергетикии назди Президенти Ҷумҳурии Тоҷикистон дар ташхиси байналмилалии Неругоҳи барқи обии «Роғун» саҳми арзанда гузоштааст. Баҳром Сироҷов бар ин назар аст, ки Неругоҳи барқи обии «Роғун» барои тамоми давлатҳои минтақа судманд аст. Хизматҳои ин марди собитқадам ва накӯном бо ду Ордени «Нишони фахрӣ», ду Ифтихорномаи фахрии Шурои Олии Тоҷикистон ва медали 10-солагии иҷлосияи 16-уми Шурои Олии Ҷумҳурии Тоҷикистон қадрдонӣ шудаанд.