ДАСТАҲОИ ҲУНАРИИ МАМЛАКАТҲОИ АЪЗОИ СҲШ БА ДУШАНБЕ ОМАДАНД

Онҳо айни ҳол дар Кохи Борбад машқ карда, ба консерти калон тайёрӣ мебинанд, ки 28 август баъди чошт намоиш дода мешавад. Тоҷикистон ҳамчун мамлакати мизбон дар консерт барномаи 45 – дақиқаинаро пешкаши тамошобинон мегардонад. Дастаҳои ҳунарии мамлакатҳои дигари аъзои СҲШ – Русия, Чин, Қазоқистон, Қирғизистон ва Ӯзбекистон барномаҳои ҳафтдақиқаинаро пешниҳод мекунанд. Консерт бо забонҳои тоҷикию русӣ ва чинӣ намоиш дода мешавад. Онро ҳунарпешагони Театри драммавии ба номи Абулқосим Лоҳутӣ бо қироати шеърҳои Абӯабдулло Рӯдакӣ оғоз хоҳанд кард. Дар консерт аз Тоҷикистон ҳунармандони Театри драммавии ба номи Лоҳутӣ, Театри давлатии академии опера ва балети ба номи С.Айнӣ, филармонияи давлатии Тоҷикистон, гурӯҳҳои ҳунарии «Шашмақом», «Зебо», «Фалак», аз Русия оркестри камеравии «Московия», аз Қирғизистон гурӯҳи рақсии «Оқмарал», аз Қазоқистон гурӯҳи овозхонони «Ринго» ва дастаи мутрибони камеравии президенти ин мамлакат ва аз Ӯзбекистон гурӯҳи ҳунарии иттиҳодияи «Ӯзбекнаво» ширкат меварзанд.