ОМОДАГӢ БА ҶАШНИ ОДАМУШШУАРО

Аз мақомоти иҷроияи ҳокимияти давлатии шаҳри Панҷакент ба мухбири АМИТ «Ховар» иттилоъ доданд, ки раиси вилоят бо рафти таъмири мақбараи устод Рӯдакӣ дар деҳаи Панҷрӯд шинос шуд. Инчунин, Қ. Расулзода бо рафти сохтмони варзишгоҳи марказӣ, ки чорабиниҳои асосии ин ҷашн дар он ҷо баргузор мегарданд, кохи фарҳанг, таъмири осорхонаи бостоншиносии ба номи Абӯабдуллоҳи Рӯдакӣ ва иншооти дигари ноҳия низ ошноӣ пайдо кард. Таҳияи барномаҳои мухталифи пурмӯҳтаво, чопи маводҳои ҷолиб аз ҳаёт ва осори Рӯдакӣ, таҳияи филмҳои мустанаду бадеӣ, намоиши филм ва барномаҳои солҳои пеш ба навор гирифта шуда, ба саҳнагузории намоишномаҳои нав дар театрҳо имконият медиҳанд, ки ҳарчи бештар ба мардум дар бораи ин фарзанди фарзонаи миллат маълумот диҳем. Ба муносибати ҷашн конфронсҳои илмӣ ва назариявӣ доир мегарданд. Аз ҷумла, конфронси байналмилалии "Андешаи ҷаҳонсози Рӯдакӣ дар оинаи муколамаи фарҳангҳо", "Рӯдакӣ — қофиласолори назм" ва ғайра аз қабили онҳоянд. Созандагиву бунёдкорӣ яке аз самтҳои муҳими сиёсати имрӯзаи давлату ҳукумат ба ҳисоб рафта, дар арафаи ҳар як ҷашну маъракаҳо даҳҳо муассисаҳои маърифативу фарҳангӣ бунёд мегарданд. Ба муносибати ин сана дар маркази шаҳру ноҳияҳо гулгашту хиёбонҳои адибон ташкил карда шуда, гузоштани муҷассама ё нимпайкара ва бунёди хиёбони Рӯдакӣ ба нақша гирифта шудаанд. Дар маркази вилояти Суғд — шаҳри Хуҷанд муҷассамаи сардафтари адабиёти тоҷик ба муносибати ин ҷашни фархунда қомат меафрозад, ки хишти нахустини онро Президенти мамлакат Эмомалӣ Раҳмон дар ҳузури аҳли фарҳанги вилоят гузошта буд. Ноҳияи Панҷакент чун зодгоҳи шоир дар арафаи ҷашн қабои нав ба бар мекунад. Дар ин ҷо силсилаи муассисаҳои нав бунёд ва як қатор муассисаҳои фарҳангӣ таъмир карда мешаванд. Барои ин бо ташаббуси Сарвари давлат маблағҳои зиёд ҷудо карда шудаанд. Корҳо ҷиҳати таъмири мақбараи устод Рӯдакӣ, китобхона, осорхона, чойхона, меҳмонхона дар деҳаи Панҷрӯд, сохтмони "Кохи фарҳанг" барои панҷсад ҷоӣ, бо панҷара иҳота намудани мамнӯъгоҳи Саразм, аз нав таҷҳизонидани осорхонаи кишваршиносии Рӯдакӣ, меҳмонхонаи "Интурист", варзишгоҳи марказии шаҳр дар арафаи ҷашн суръати тоза мегиранд. Роҳи мошингарди Шӯрча-Панҷрӯд-Артуч таъмир карда, соҳилҳои дарёчаи Киштӯд бо ҳашари мардум мустаҳкам карда мешаванд. Дар анҷоми сафар раиси вилоят Қоҳир Расулзода ба мақомоти дахлдор супориш дод, ки суръати корҳоро тезонида, дар мӯҳлати пешбинишуда муассисаҳои ҷашниро ба истифода диҳанд.