ТЕАТРИ ҶАВОНОНИ ТОҶИКИСТОН ДАР ҶАШНВОРАИ БАЙНАЛХАЛҚӢ ШИРКАТ МЕВАРЗАД

Душанбе, 27 август. (АМИТ «Ховар», Таҳмина Ғоибназарова). – Театри давлатии ҷавонони Тоҷикистон ба номи Маҳмудҷон Воҳидов дар Ҷашнвораи дуюми байналхалқии театрҳо иштирок менамояд, ки 2 сентябр дар Алмаато кушода хоҳад шуд. Директори театр Саид Абдуллоев ба АМИТ «Ховар» хабар дод, ки дар ин ҷашнвора асари саҳнавии коргардон Султон Усмонов «Зани сарватманд» намоиш дода мешавад. Нақшҳои асосиро дар он ҳунармандон И. Нуриддинов ва Г.Абдулхайрова иҷро менамоянд. Коргардони театр зикр намуд, ки дар оғози мавсими нави театрӣ якбора се намоишнома пешкаши тамошобинон гардонда мешавад. Онҳо намоишномаҳои «Зани сарватманд», «Рӯзи дарозтар аз аср» ва «Ярч» мебошанд.