ҒАМХОРИ ДОНИШҶӮЁН

Душанбе, 26 сентябр. (АМИТ «Ховар», Лаззат Диловарзод).-Бино ба гуфти раиси ноҳияи Шаҳритус Холмурод Раҳмонов, роҳбарияти ноҳия ҳама тадбирҳоро меандешад, то ки дар вилояти Хатлон аввалин шуда аз иҷрои нақшаи ҷамъоварии пахта бароянд. То 22 сентябр дар хоҷагиҳои ноҳия ба миқдори 9830 тонна пахта ҷамъоварӣ намуданд. Ҳар рӯз дар саҳрои хоҷагиҳои пахтакор бештар аз 7 ҳазор нафар чинакчию ҳашарчиён ба кор мебароянд. Чунин муташаккилии кор аст, ки хоҷагиҳо ба ҷалби донишҷӯён дар ҷамъоварии пахта ниёз надоранд. Натиҷаи кори чинакчиён ҳар рӯз дар сари тарозу ҷамъбаст шуда, ҳақи чиниши онҳо ки барои ҷамъоварии пахтаи сафед 25 дирам ва барои пахтаи маҳиннах 30 дирам муайян шудааст, пардохт карда мешавад. Ҳамин тадбир боис шуд, ки мардум пахтаро на ба қувваи донишҷӯён балки бо қувваи худ ҷамъоварӣ намоянд.