ҲАЛОКАТИ ТЕЪДОДИ ЗИЁДИ ОДАМОН ДАР НАТИҶАИ ТӮФОНИ БАҲРӢ

Порто — Пренса, 4 сентябр. (АМИТ «Ховар» — ИТАР — ТАСС).- Бар асари боронҳои шадид, сел ва обхезӣ, ки дар натиҷаи тӯфони баҳрии тропикии «Ханна» қисми зиёди Гаитиро фаро гирифта буд, камаш 61 нафар ҳалок шуд. Танҳо дар минтақаҳои шимолии мамлакат ҳалокати 37 нафар ба қайд гирифта шуд. Мақомоти мамлакат то ҳол ҳаҷми зарари модии фалокати табииро аниқ муқаррар карда наметавонанд. Аз рӯи маълумоти пешакӣ, дар натиҷаи тӯфону обхезӣ ва сел ҳазорон хона харобу валангор гардида, даҳҳо ҳазор нафар одамон бесарпаноҳ монданд. Ҳафтаи гузашта Гаити ва мамлакатҳои дигари минтақа аз тӯфони тропикии «Густав» зарари калон дида буданд.