ИШТИРОКИ АНСАМБЛИ «РОЗ» ДАР ФЕСТИВАЛИ БАЙНАЛМИЛАЛӢ

Душанбе, 16 сентябр (АМИТ «Ховар», Бурҳониддин Каримзода).-Чанде пеш дар шаҳри Вангени Олмон фестивали байналмилалии фолклор ва рақс баргузор шуд. Дар ин чорабинии бонуфузи фарҳангӣ ба намояндагӣ аз Ҷумҳурии Тоҷикистон ансамбли фалаки Консерваторияи миллии Тоҷикистон «Роз» иштирок намуд. — Дар фестивал гурӯҳҳои ҳунарии фолклорӣ аз Россия, Португалия, Марокко, Аргентина ширкат доштанд. Чӣ дар консертҳои алоҳида ва чӣ дар баромади расмии фестивал ҳайати ҳакамон ва меҳмонону тамошобинон ба ҳунарнамоии гурӯҳи «Роз» баҳои баланд доданд,- гуфт ба хабарнигори АМИТ «Ховар» роҳбари ҳайати намояндагони Тоҷикистон, ректори Консерваторияи миллии Тоҷикистон, профессор Раҷабмад Амиров. Дар маҳфили ҷамъбастии фестивал аз номи бургомистри шаҳри Ванген ва директори фестивал, профессор Рудольф Зигерист ба ҳунармандони ансамбли «Роз» дипломҳо тақдим карда шуд.