МУҶАССАМАИ РӮДАКӢ ДАР МАРКАЗИ ВИЛОЯТИ СУҒД ҚОМАТ АФРОХТ

          Хуҷанд, 9 сентябр. ( АМИТ «Ховар», Бекназари Абӯбакр) — Субҳи имрӯз, 9 сентябр Президенти Ҷумҳурии Тоҷикистон Эмомалӣ Раҳмон ҷиҳати иштирок дар маросими ба истифодадиҳии иншооти ҷашнӣ бахшида ба 17-умин солгарди истиқлолияти давлатии Ҷумҳурии Тоҷикистон ва 1150 солагии сардафтари адабиёти классикии тоҷику форс Абӯабдуллои Рӯдакӣ ба вилояти Суғд сафар кард.         Сарвари давлатро дар фурудгоҳи «Хуҷанд» раиси вилояти Суғд Қоҳир Расулзода ва дигар шахсони расмӣ пешвоз гирифтанд.         Сарвари давлат Эмомалӣ Раҳмон дар маркази вилоят канори дарёи Сир парда аз рӯи пайкараи султони шоирон — А. Рӯдакӣ бардошта, оид ба мақому мартаба ва шӯҳрати ҷаҳонии устод Рӯдакӣ сухан ронд.         Мухбири АМИТ «Ховар» иттилоъ медиҳад, ки сохтмони муҷассама соли 2007 оғоз гардида, арзиши он ба 3,4 млн. сомонӣ баробар аст. Масоҳати умумии майдони муҷассама 1,31 га буда, баландии он 14,5 метр мебошад. Вазнаш 11 тоннаро ташкил медиҳад.