НАМОИШГОҲИ ТИББӢ ДАР ДУШАНБЕ

Душанбе, 26 сентябр. (АМИТ «Ховар», Покиза Маҳмадбекова). – Аз 7 то 9 октябри соли равон дар шаҳри Душанбе намоишгоҳи махсуси байналхалқии тиббӣ баргузор мегардад. Яке аз ҳадафҳои намоишгоҳ ба роҳ мондани ҳамкории тиббӣ дар соҳа мебошад. Иштирокчиёни намоишгоҳ дар бораи дастовардҳои нави илмӣ, талаботу пешниҳодоти соҳа дар минтақа маълумоти тоза гирифта, молу хизматҳои худро ба тамошобинон пешкаш намуда, қарордоду созишномаҳои ҳамкорӣ имзо менамоянд. Мухбири АМИТ «Ховар» хабар медиҳад, ки дар намоишгоҳ намояндагони соҳаи тибби Афғонистон низ ширкат меварзанд. Корхонаҳо ва муассисаҳои тиббии Тоҷикистон дар намоишгоҳ асбобу анҷом ва таҷҳизоти тиббӣ, лавозимоти озмоишгоҳ, технологияи навтарини тиббӣ, асбобу анҷоми ташхиси беморӣ, дору ва ғайраро ба маърази тамошо мегузоранд. Намоишгоҳи мазкур як навъ воситаи иваз кардани таҷрибаи пешқадам мебошад. Дар он масъалаҳои муҳимтарини беҳтар сохтани сифати хизматрасонии тиббӣ дар ҷумҳурӣ баррасӣ карда мешаванд. Хабар дода мешавад, ки дар намоишгоҳ корхонаю муассисаҳои тиббии мамлакатҳои Осиёи Марказӣ, ИДМ ва Аврупои Шарқӣ иштирок менамоянд.