ПЕШНИҲОДИ ПРЕЗИДЕНТИ ҶУМҲУРИИ ТОҶИКИСТОН ДАР МАҶМАИ КУЛЛИ СММ

Душанбе, 26 сентябр. (АМИТ «Ховар», Бекназари Абӯбакр). — 25 сентябр Президенти Ҷумҳурии Тоҷикистон Эмомалӣ Раҳмон дар мубоҳисаи умумии сиёсии Иҷлосияи 63 – юми Маҷмаи кулли Созмони Миллали Муттаҳид сухан ронда, таваҷҷӯҳи сарони давлатҳо ва намояндагони воломақоми созмонҳои байналмиллалиро ба масъалаи истифодаи самараноки захираҳои обию энергетикии кишварҳои Осиёи Марказӣ ҷалб кард. Ӯ аз ҷумла гуфт, ки об на танҳо барои истеъмол, балки барои амалӣ сохтани ҳадафҳои истеҳсолот, ҳифзи муҳити зист ва рушд аҳамияти ҳаётан муҳим дорад. Ҳалли проблемаҳои муҳимтарини вобаста ба об, рушди ҳамкории байналхалқӣ дар ин соҳа, аз ҷумлаи вазифаҳои Даҳсолаи байналхалқии амалиёти «Об барои ҳаёт» мебошад, ки бо ташаббуси Ҷумҳурии Тоҷикистон эълон шудааст. «Дар давоми якчанд соли охир чорабиниҳои зиёди сатҳи гуногун муқаррар карда шуданд, вале шиддати ин мушкилот то ҳанӯз боқист. Бинобар ин, Ҷумҳурии Тоҷикистон барои муҳокимаву баррасии умумӣ ва ҳалли проблемаҳои об, муттаҳид сохтани кӯшишҳо дар сатҳи миллӣ, минтақавӣ ва байналмилалӣ пешниҳод мекунад, ки иҷлосияи махсуси Маҷмаи кулли Созмони Милали Муттаҳид дар масоили об гузаронида шавад. Зеро, Мулоқоти мазкур метавонад ҷараёни ҳалли мушкилоти Даҳсолаи обро арзёбӣ карда, масъалаҳои афзалиятноки минбаъдаро муайян намояд», — тазаккур дод Эмомалӣ Раҳмон.