САМБОЧИЁНИ ТОҶИК АЗ ҚАҲРАМОНИИ ҶАҲОН БО 5 МЕДАЛ БАРГАШТАНД

             Душанбе, 15 октябр. (АМИТ «Ховар», Пайрав Назаров).- Дар шаҳри Тошканд қаҳрамонии ҷаҳон оид ба гуштии самбо байни наврасону ҷавонон ба анҷом расид. Самбочиёни тоҷик 5 медал — 1 тилло, 1 нуқра ва 3 биринҷӣ ба даст оварданд.              Тавре ба мухбири АМИТ «Ховар» дар Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон хабар доданд, паҳлавони навраси тоҷик Акмалиддин Каримов дар вазни то 48 килограмм ба унвони қаҳрамонӣ ва медали тилло даст ёфт. Айниддин Қурбонов дар ин вазн байни ҷавонон ҷои дуввумро касб карда, бо медали нуқра мукофотонида шуд.              Инчунин, Сулаймон Сулаймонов дар вазни то 74 килограмм байни ҷавонон, Файзиддин Абдуллоев дар вазни то 70 килограмм байни наврасон ва Рашид Раҳимов дар вазни то 75 килограмм миёни наврасон медали биринҷӣ гирифтанд. Дар ин мусобиқот варзишгарон аз 35 кишвар ширкат карданд.             Дар ҳисоби даставӣ Русия бо касби 28 медал, аз ҷумла 16 тилло ғолиб шуд. Дастаҳои мунтахаби Қазоқистон ҷои дуввум ва Беларус ҷои саввумро касб карданд. Тоҷикистон дар ҷои 6-ум қарор гирифт.