ҲИФЗИ ХОК БО ИСТИФОДА АЗ ПИСТАИ ЭРОНӢ

          Душанбе, 11 ноябр. (АМИТ  «Ховар»,  Лаззат Диловарзод).- Дар Пажӯҳишгоҳи хокшиносӣ ба мухбири АМИТ «Ховар» иттилоъ доданд, ки дар шароити хоки хокистарии равшан кишти самараноки гандуми тирамоҳӣ бо истифодаи усули коркарди ҳадди ақали хок,  дар майдони 300 га замини хоҷагиҳои деҳқонӣ (фермерӣ)-и ноҳияҳои Панҷ, Бохтар ва Қубодиёни вилояти Хатлон, ки олимони пажӯҳишгоҳи мазкур пешниҳод намудаанд, ҷорӣ карда шуд. Аз шаш навъи  гандуми дар қитъаҳои таҷрибавии ин ноҳияҳо киштшуда се навъи он; «Шарора», «Ласточка» ва «Норман» барои кишт дар ин заминҳо тавсия карда шуд.  Ҳамзамон, дар шароити хоки хокистарии тираи ба эрозия гирифторшудаи мавзеи Фахрободи ноҳияи Хуросон барои ҳифзи хок дар масоҳати 2,5 километр зинаҳои сунъии нишебиҳо бо истифода аз навъҳои пистаи эронӣ зинабоғҳо бунёд карда шуданд.