ҶАМШЕД ИСМОИЛОВ: «ДАР СОХТМОНИ «РОҒУН» САҲМИ ХУДРО МЕГУЗОРЕМ!»

              Душанбе, 11 ноябр. (АМИТ «Ховар», Пайрав Назаров).- 10-уми  ноябри соли ҷорӣ дар шаҳри Роғун  ҳунармандони Иттиҳодияи давлатии гурӯҳҳои эҷодию консертии назди Вазорати фарҳанги Ҷумҳурии Тоҷикистон бо мақсади болидахотир намудани сохтмончиёни нерӯгоҳи барқӣ-обии «Роғун» консерти идона доир намуданд. Тавре ба АМИТ «Ховар» директори Иттиҳодияи давлатии гурӯҳҳои эҷодию консертии назди Вазорати фарҳанги ҶТ Ҷамшед Исмоилов хабар дод, дар консерт ҳунармандон ва овозхонҳои маъруфи гурӯҳҳои оркестрии «Гулшан» ва дастаи рақсии «Ҷаҳоноро»  бо барномаи нави ҳунарӣ баромад намуданд. «Иттиҳодияи мо ният дорад, ки  дар оянда аз ҳисоби маблағҳои аз консертҳо бадастомада дар сохтмони нерӯгоҳи барқӣ- обии «Роғун» саҳми худро гузорад», — зикр намуд Ҷамшед Исмоилов. Инчунин, дар ҷараёни сафар аз ҳисоби ҶСШК «Матбуот» ба китобхони НБО «Роғун» зиёда аз сад нусха китоб супорида шуд.