КОНФРОНСИ ИЛМИЮ АМАЛӢ

        Душанбе, 24 ноябр. (АМИТ «Ховар», Людмила Дубинина).- 21 ноябр дар факултаи журналистикаи Донишгоҳи миллии Тоҷикистон конфронси илмӣ ва амалӣ баргузор гардид. Яке аз масъалаҳои асосии конфронс проблемаҳои риоя намудани талаботи меъёрҳои Қонуни асосии ҷумҳурӣ дар воситаҳои ахбори оммавӣ буд. Дар ин хусус мудири кафедраи журналистикаи байналхалқии донишгоҳ, доктори илми таърих, профессор Иброҳим Усмонов сухан ронд. Суханронии мудири кафедраи радио ва телевизиони донишгоҳ, профессор Асадулло Саъдуллоев ва муаллими калони кафедраи матбуоти донишгоҳ Қироншоҳ Шарифзода ба масъалаҳои шахсият ва маҳорати рӯзноманигорон ва проблемаҳои таъмини амнияти иттилоотӣ дар ҷумҳурӣ бахшида шуд.       Иштирокчиёни конфронс баъдан масъалаи қабули Кодекси одоби журналистиро муҳокима намуданд. Зикр шуд, ки кодекси мазкур бояд на танҳо асоси тарбияи журналистони ҷавон гардад, балки ба ҳалли проблемаҳои фаъолияти воситаҳои ахбори оммавӣ мусоидат карда тавонад.