ДАР ҶТ ШАҲРВАНДОНИ ХОРИҶӢ ҲУҶҶАТИ ЛОЗИМӢ НАДОРАНД

Душанбе, 17 декабр. (АМИТ «Ховар», Мавҷуда Давлатзода).- Бо супориши роҳбарияти Вазорати корҳои дохилии ҶТ ва мувофиқи нақшаи кории Хадамоти муҳоҷиратии ВКД оид масъалаҳои буду бош, аз қайдгузарӣ ва фаъолияти меҳнатии шаҳрвандони хориҷӣ дар дохили ҷумҳурӣ рейдҳои муштарак гузаронида шуда истодааст. Ҳангоми гузаронидани ин чорабиниҳо кормандони Хадамоти муҳоҷирати ВКД то кадом дараҷа дуруст будани ҳуҷҷатҳои шаҳрвандони хориҷӣ дида баромада, риоя намудани талаботи қонунҳои Ҷумҳурии Тоҷикистонро дар самти муҳоҷират таҳти назорати қатъӣ қарор доданд. Ҳамзамон, гурӯҳи корӣ чорабинии санҷишиеро дар ҳудуди ноҳияи Ваҳдат доир намуд. Ҳангоми санҷиши якчанд корхонаву ширкат, аз қабили «Ориё», «МТЛ-таҷдиди роҳҳо» ва «Строй-Форс» маълум гардид, ки 11 нафар шаҳрвандони хориҷӣ барои муайян намудани шахсияташон бо худ ягон ҳуҷҷати лозимӣ надоранд. Вазорати корҳои дохилӣ баҳри ба танзим даровардани раванди вориду хориҷ шудани шаҳрвандони хориҷӣ ва барои бехатарии шаҳрвандони кишвар тамоми чораҳои лозимиро дида мебарояд.  Бояд зикр намуд, ки чунин рейдҳои муштарак аз ҷониби кормандони ҷузъу томҳои Хадамоти муҳоҷиратии ВКД дар тамоми манотиқи кишвар гузаронида мешавад.