ДАР МАРКАЗИ ФАРҲАНГИИ ҶАВОНОН ОЗМУН ДОИР МЕГАРДАД

                  Душанбе, 22 декабр. (АМИТ «Ховар», Пайрав Назаров).- Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон барои сарояндагони ҷавони эстрадӣ таҳти унвони «Ориён, Сомониён, Тоҷикистон» озмуни ҷумҳуриявӣ эълон намудааст.                  Тавре ба АМИТ «Ховар» дар Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон хабар доданд, баргузории озмуни сарояндагони ҷавонӣ эстрадӣ-«Ориён, Сомониён, Тоҷикистон» имкон дод, то бисёр истеъдодҳои ҷавон, гурӯҳҳои созию овозӣ рӯи саҳна оянд.                  Озмунҳо дар шаҳру ноҳияҳои вилояти Хатлон, шаҳру ноҳияҳои Турсунзода , Ҳисор, Варзоб, Рӯдакӣ, Ҷиргатол, Рашт, Файзобод, ҳамзамон байни донишҷӯёни макотиби олӣ доир гардида, рӯйхати ғолибон ба Кумита пешниҳод гардидааст.                   Озмун рӯзҳои 25,27 -уми декабри соли ҷорӣ дар толори Маркази фарҳангии ҷавонони Тоҷикистон- «Ориёно» доир мегардад.