КОНФРОНСИ ИЛМӢ БАХШИДА БА 100-СОЛАГИИ ЗОДРӮЗИ БОБОҶОН ҒАФУРОВ

                Душанбе, 22 декабр. (АМИТ «Ховар», Лутфия Эшонқулова).- Имрӯзҳо бахшида ба 100-солагии зодрӯзи қаҳрамони Тоҷикистон, академик Бобоҷон Ғафуров дар бисёр донишгоҳу муассисаҳои фарҳангӣ чорабиниҳо мегузаронанд. Аз ҷумла, дар Китобхонаи миллии ҶТ ба номи А. Фирдавсӣ таҳти унвони «Бобоҷон Ғафуров ва масоили китобдории сарчашмаҳои таърихӣ» конфронси илмӣ баргузор гардид.               Дар он олимону муаррихон ва кормандони китобхона иштирок намуда, оид ба ҳаёт ва фаъолияти академик, аҳамияти «Тоҷикон»- и Бобоҷон Ғафуров ва саҳми ӯ дар таъмини библиографии манбаъҳои таърихӣ маърӯза хонданд.                Зикр гардид, ки саҳми Бобоҷон Ғафуров дар шиносониди тоҷикон ва фарҳангу тамаддуни халқи тоҷик ба мардуми ҷаҳон назаррас аст. Академик бо эҷоди асари баландмазмуни худ «Тоҷикон» тавонист барои имрӯзу ояндаи миллати тоҷик осори гаронбаҳое ба мерос гузорад. Ин аст, ки китоби «Тоҷикон» аз тарафи хонандагон бо мароқи беандоза мутолиа шуда, ҳамчун сарчашмаи таърихӣ ба олимону муаррихони тоҷик хизмат мерасонад.