КОРШИНОСОНИ РОССИЯ ДАР ТОҶИКИСТОН СЕМИНАР МЕГУЗАРОНАНД

             Душанбе, 4  декабр. (АМИТ «Ховар»,  Покиза  Маҳмадбекова). – Раиси  палатаи  савдо ва  саноати  Тоҷикистон  Шариф Саид  бо  гурӯҳи намояндагон ва коршиносони Палатаи тиҷоратии  Федератсияи  Россия  мулоқот  кард. Зимни  мулоқот  масъалаҳои   марбут  ба  вазъи  имрӯзаи  ҳамкории палатаҳои  тиҷоратии  ҳар  ду  кишвар ва  рушди  муносибатҳои онҳо дар  доираи  Шӯрои  палатаҳои  савдою  саноати  мамлакатҳои  ИДМ  баррасӣ  карда  шуданд.            Мусоҳибон  ба баъзе  проблемаҳои  амалӣ  сохтани   паймонҳои   ҳар  ду  мамлакат,  хусусияти   гузаронидани  ташхиси  мустақилона  ва  додани  сертификатҳои  муайян  намудани  маҳалли  истеъсоли мол  ва  ғайра  диққати  калон  доданд. Ш. Саид  аз  сатҳи  имрӯзаи  муносибатҳо ва  ҳамкории   Платаҳои  савдо ва  саноати  Тоҷикистону  Россия  изҳори  қаноатмандӣ  намуд. Вай   аҳамияти  калони  омода  сохтани  мутахассисони  варзидаро  барои  Тоҷикистон  таъкид  кард.            Мухбири  АМИТ «Ховар»  хабар  медиҳад, ки  мутахассисони  палатаи  тиҷоратии   Русия  барои  ҳамкасбони  худ  дар  мавзӯъҳои  гуногун  семинар   мегузаронанд.  Семинари  мазкур  мувофиқи  паймони  бадастовардаи  Палатаи  савдо  ва  саноати  Ҷумҳурии  Тоҷикистон ва  Палатаи  тиҷоратии  Россия  гузаронида  мешавад. Семинар  се  рӯз  давом  мекунад.