МАҒОЗАИ СОҲИБКОРИ АФҒОНРО ҒОРАТ КАРДАНД

Душанбе, 23 декабр. (АМИТ «Ховар», Мавҷуда Давлатзода).- Сокини вилояти Тахори Ҷумҳурии Исломии Афғонистон, соҳибкор Абдуҳайдар Ғуломсодиқи 39-сола ба Шӯъбаи корҳои дохилии шаҳри Хоруғи Вилояти Мухтори Кӯҳистони Бадахшон оид ба ғорат шудани мағозааш бо ариза муроҷиат намуд. Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» иттилоъ доданд, ки шахсони номаълум шаби 19-ум ба 20-уми декабри соли ҷорӣ ба мағозаи Абдуҳайдар Ғуломсодиқ ворид шуда, аз он ҷо 11 телефони мобилии тамғаи «LG», 2 телефони мобилии «Nokia», 7 телефони мобилии «Samsung», 10 флешка, 2 акумулятор ва 10 чархи мошинро дуздида, аз ҷои ҳодиса ғайб задаанд, ки маблағи умумии онҳо 8990 сомониро ташкил медиҳад. Оид ба ин ҳодиса парвандаи ҷиноӣ боз гардида, тафтиш идома дорад.