МУҲОКИМАИ МАСЪАЛАИ ҲАМКОРИИ СААД БО СОЗМОНҲОИ БАЙНАЛХАЛҚӢ

            Маскав,  17  декабр. (АМИТ «Ховар» — Ҳалима  Хушқадамова). – Пагоҳ,  18  декабр  дар Шӯрои  Федератсияи  Русия  дар  мавзӯи «Вазъи  имрӯза ва  нақшаҳои  ояндаи   ҳамкории  Созмони  аҳдномаи  амнияти   дастаҷамъӣ бо   созмонҳои  байналхалқӣ  дар  таъмини  амнияти  дастаҷамъии  минтақавӣ» конфронси   байналхалқӣ  баргузор  мегардад. Дар  он   раиси   Шӯрои  Федератсия Сергей  Миронов  иштирок  мекунад. Иштирокчиёни  конфронс  масъалаҳои  марбут  ба  тағйироти   вазъияти   геополитикии  ҷаҳон  ва  минтақа,  вазифаҳо  ва  самтҳои  фаъолияти   созмонҳои  байналхалқию  минтақавӣ, аз  ҷумла, СААД, ИДМ,  СҲШ  ва  Ҷомеаи  иқтисодии  Евразия,  зарурати  афзун  гардонидани  самараи  фаъолияти  онҳо,  аз  ҷумла,  роҳу  усулҳои  муҳайё  сохтани  шароитро  ба  рушди устувору  бехатари  сиёсию  иқтисодии  давлатҳои  аъзои  созмон,  тадбирҳои  мубориза  ба  муқобили  таҳдидҳо  ва  зуҳуроти  замони  ҳозира  ва  нақшаҳои  ҳамкории  СААД – ро  бо  созмонҳои  байналхалқӣ  дар  бобати таъмини  амният  ва  ғайраро  баррасӣ  менамоянд. Дар  конфронс   намояндагони   Шӯрои  Федератсия,  Думаи  давлатӣ,  Кумитаи  иҷроияи  ИДМ, СҲШ,  СААД ва  олимони  соҳаи  амнияти  байналхалқӣ,  ҳуқуқ,  тадқиқоти  стратегии проблемаҳои  низомӣ  ширкат  меварзанд.