НАМОИШИ МАҲСУЛОТИ САНОАТӢ ДАР ВАЗОРАТ

          Душанбе,  23  декабр. (АМИТ «Ховар»,   Людмила  Дубинина). – Чанд  рӯз  пеш  дар  вазорати  энергетика  ва  саноати  Тоҷикистон   намоишгоҳи  маҳсулоти  саноатӣ  кушода  шуд. Дар  он  маҳсулоти  бештар аз  130   корхонаи  саноатии  мамлакат  намоиш  дода  мешавад. Сармутахассиси  раёсати   илму  техника  ва технологияи  вазорат Ҳусниддин Набиев  зикр  кард, ки  дар  ин  ҷо   қариб  480   намуди  маҳсулот  ва  акси  навъҳои  гуногуни  маснуоти  корхонаҳои  саноатии  мамлакат   намоиш  дода  мешаванд. Яке  аз  онҳо  корхонаи  брикетбарорӣ  мебошад. Маҳсулоти  корхона  асосан   барои  гарм  кардани  хонаҳо  истифода бурда  мешавад. Дар  шӯъбаҳои  дигари  намоишгоҳ  маҳсулоти  корхонаю  муассисаҳои   истихроҷи  маъдан,  фулузгудозӣ,  фулузоти  ранга,  корхонаҳои  саноати  кимёвӣ,  сабук,  озуқа  ва  ғайра   пешкаши  тамошобинон  гардонда  мешавад. Ҳ. Набиев   зикр  кард, ки  ояндаи  наздик дар  заминаи  намоишгоҳ  осорхонаи  маҳсулоти  саноатӣ  ташкил  карда  хоҳад  шуд.