ТОҶИРОНИ ТОҶИК 5700 МОШИНИ ЧИНӢ ОВАРДАНД

Бадахшон, 15 декабр. (АМИТ «Ховар», Л. Додоев).- Тоҷирони тоҷик аз Чин мошинҳои гуногунтамғаро ба ҷумҳурӣ ворид менамоянд. Тавре аз Раёсати гумруки вилояти Бадахшон иттилоъ доданд, соли ҷорӣ аз Чин ба ҷумҳурӣ 5700 автомашинаи гуногунтамға овардаанд. Коршиносон омили бо чунин миқдори зиёд харидорӣ кардани автомашинаҳои чиниро дар он мебинанд, ки маркази савдои шаҳри Қошғар аз марзи Тоҷикистон ҳамагӣ 700 км дур аст. Инчунин, мошинҳои истеҳсоли Чин пурбардоштанду барои ба истифода додани онҳо сӯзишвории кам харҷ мешавад. Имсол роҳи Қулма, ки воситаи воридсозии нақлиёт ба ҷумҳурӣ аст, аллакай 1-уми декабр баста шуд. Тибқи шартномаи тарафайни Тоҷикистону Чин, он моҳи майи соли 2009 кушода мешавад.