ГУЗАРОНИДАНИ НАМОИШГОҲ ДАР ШАҲРИ ДУШАНБЕ ДАР СОЛИ 2009

Душанбе, 13 январ. (АМИТ «Ховар», Покиза Маҳмадбекова). – «Ҳаҷми умумии хизматрасонии Палатаи савдо ва саноати Ҷумҳурии Тоҷикистон дар давоми соли 2008-ум  3 миллиону 470,5 ҳазор сомониро ташкил дод, ки ин нишондиҳанда 966,6 ҳазор сомонӣ аз нақша зиёд аст», — иброз дошт зимни нишасти матбуотӣ муовини раиси Палатаи савдо ва саноати ҷумҳурӣ Асанали Карамалиев 13 январи соли равон.            Ҳамчунин дар нишасти мазкур қайд гардид, ки дар соли равон зиёда аз 33 намоишгоҳи байналмилалию ҷумҳуриявӣ гузаронида шуд. Дар назар аст, ки дар соли 2009 ин нишондиҳандаро зиёд намоянд. То имрӯз палата гузаронидани 14 намоишгоҳи байналмилалиро дар шаҳри Душанбе ба нақша гирифтааст. Аз ҷумла, гузаронидани намоишгоҳи байналмилалии молу маҳсулоти Ҷумҳурии мардумии Чин дар шаҳри Душанбе, ки оиди ин масъала гуфтушунидҳо давом доранд, гузаронидани Намоишгоҳи навбатии «ИтерЛегпром» дар шаҳри Душанбе, Намоишгоҳи молу маҳсулоти соҳибкорони Афғонистон дар Ҷумҳурии Тоҷикистон ва инчунин, Намоишгоҳи молу маҳсулоти Ҷумҳурии Белорус дар Душанбе дар назар аст.