МАҚОЛАИ БЕҲТАРИНРО $ 1000 ИНТИЗОР АСТ

             Душанбе, 27 январ.(АМИТ «Ховар», Марзия Саидова).- Бахшида ба 30-умин солгарди пирӯзии Инқилоби исломии Эрон ва Рӯзи ҷашни миллии ин кишвар Сафорати Ҷумҳурии Исломии Эрон дар Ҷумҳурии Тоҷикистон озмуни мақолаи беҳтаринро дар байни рӯзноманигорони тоҷик эълон кард.             Аз Сафорати ин кишвар ба АМИТ «Ховар» иттилоъ доданд, ки дар озмун рӯзноманигорони матуботи давлатӣ ва мустақили Тоҷикистон имкони иштирок карданро доранд.            Тибқи шартҳои озмун мавзӯи мақола бояд дар хусуси Инқилоби Исломии Эрон ва ё дастовардҳои он бахшида шавад. Мақолаи пешниҳодшуда бояд аз ду саҳифаи чопии маъмулӣ кам набуда, муаллифи мақола узви расмии яке аз нашриёти шинохташудаи Тоҷикистон бошад. Шарти дигари озмун чопи мақола дар яке аз нашрияҳои сертиражи Тоҷикистон то 10 феврали соли равон аст.             Муаллифи мақолаи беҳтаринро 1000 доллар, ғолиби зинаи дуюмро 700 доллар ва ҷойи сеюми озмунро 500 доллар интизор аст.