ШАРОИТИ ХУБИ ХИЗМАТРАСОНӢ ДАР МУАССИСАҲОИ СТАТСИОНАРӢ

            Душанбе, 12 январ. (АМИТ «Ховар», Лаззат Диловарзод).- Бино ба суханони директори Агентии давлатии ҳифзи иҷтимоӣ, шуғли аҳолӣ ва муҳоҷират Баҳриддин Ҷабборов, соли 2008 бо мақсади беҳтар намудани хизматрасонии иҷтимоӣ ба маъюбон, собиқадорони ҷангу меҳнат, бошандагони муассисаҳои статсионарӣ ва дигар табақаҳои ниёзманд шароити хуб фароҳам оварда шуд. Фаъолият дар 5 хона-интернати пиронсолон ва маъюбон (бо се шӯбаи кӯдакона), 2 хона-интернати касалиҳои рӯҳӣ, хона-интернати кӯдакони ноқисулақли «Чорбоғ», литсей-интернати касбии махсуси маъюбон, Корхонаи давлатии заводи протезию ортопедӣ ва 4 осоишгоҳу истироҳатгоҳҳо ба низом дароварда шуд. Нишондодҳои хизматрасонӣ дар натиҷаи заҳмати шабонарӯзии кормандони ин муассисаҳои статсионарӣ беҳтар гардид.