СОХТМОНИ ХОНА-ИНТЕРНАТИ «ЧОРБОҒ» ДАР СОЛИ 2009

                                                                        Душанбе, 13 январ. (АМИТ «Ховар», Лаззат Диловарзод).- Дар соли 2009 сохтмони бинои сеюми хона-интернати кӯдакони ноқисулақли  «Чорбоғ»давом  дода мешавад,- иброз доштанд дар Агентии давлатии ҳифзи иҷтимоӣ, шуғли аҳолӣ ва муҳоҷират ба мухбири АМИТ «Ховар». Боиси ёдоварист, ки дар соли 2008 бинои дуюми хона-интернати кӯдакони  ноқисулақли «Чорбоғ» барои 100 нафар кӯдакони маъюб тавассути инвеститсияи хориҷӣ сохта ба истифода дода шуд. Айни замон дар хона-интернати «Чорбоғ» 179 нафар кӯдакони маъюб парасторӣ мешаванд. Соли 2009 корҳои сохтмонӣ дар бинои сеюми хона-интернати «Чорбоғ», хона-интернати пиронсолон ва маъюбони «Батош»-и шаҳри Турсунзода, хона-интернати беморони касалиҳои рӯҳӣ дар ноҳияи Бохтар давом дода мешаванд ва ба ин мақсад маблағи муайян ҷудо карда шудааст.