МУНШИИ УМУМИИ СММ ДАР АФҒОНИСТОН

                  Кобул, 5 феврал. (АМИТ «Ховар» — Синхуа). — Муншии умумии Созмони Милали Муттаҳид Пан Ги Мун 4 феврал барои боздид ба Кобул омад. Вай зимни мулоқот бо президенти Афғонистон Ҳамид Карзай зикр намуд, ки Созмони милал мисли пештара ба ҳалли проблемаҳои Афғонистон диққати аввалиндараҷа медиҳад. Таъкид шуд, ки мамлакатҳои мададгори Афғонистон ва ҷомеаи ҷаҳон бояд ӯҳдадориҳои ба зимма гирифтаашонро дар бобати дастгирии Афғонистон пурра ва қатъӣ иҷро намоянд.                  Баъдан масъалаҳои марбут ба таъмини амнияти Афғонистон ва тайёрӣ ба интихоботи президенти мамлакат муҳокима шуданд.                  Пан Ги Мун дар ҷараёни нишасти матбуотӣ изҳор намуд, ки Афғонистон дар ҷараёни омодагӣ ба интихоботи президент ва тақвияти мубориза ба муқобили силоҳбадастон соли равон ба таҳдидҳои нисбатан мураккаб мувоҷеҳ хоҳад гашт.                  Қайд карда шуд, ки СММ ҳамаи вазифаҳои худро дар бобати дастгирии Афғонистон комилан иҷро хоҳад кард.