СОЗМОНИ САДО ВА СИМОИ ЭРОН БА КУМИТАИ РАДИО ВА ТЕЛЕВИЗИОН КӮМАКИ ТЕХНИКӢ МЕРАСОНАД

                    Душанбе, 19 феврал.(АМИТ «Ховар», Марзия Саидова).-Масъалаҳои дурнамои тақвияти ҳамкорӣ байни Кумитаи радио ва телевизиони назди Ҳукумати Ҷумҳурии Тоҷикистон ва Созмони садо ва симои Ҷумҳурии Исломии Эрон 19 феврал зимни мулоқоти роҳбарони ин ду идора- Асадулло Раҳмонов ва Сайид Изатулло Зарқомӣ дар Душанбе баррасӣ гардиданд.                   Зимни мулоқоти судманд ҷонибҳо пешниҳод карданд, ки дар оянда ҳамкориро дар бахши табодули барномаҳои радиоӣ ва телевизионӣ инчунин, филмҳо тақвият бахшида, табодули кормандони радио ва телевизиони Тоҷикистонро ба Эрон таҳким мебахшанд.                 Зикр шуд, ки дар шаҳри Душанбе ташкили курсҳои омӯзишӣ ҷиҳати баланд бардоштани сатҳи касбияти кормандони эҷодию техникии Кумитаи радио ва телевизиони Тоҷикистон ба манфиат буда он дар оянда созмон дода мешавад.                   Муовини аввали Раиси Кумитаи радио ва телевизиони назди Ҳукумати ҷумҳурӣ Абдураҳмон Абдуманнонов дар сӯҳбат ба хабарнигори АМИТ «Ховар» гуфт, ки дар ҷараёни мулоқот раисони кумитаҳои радио ва телевизиони ду кишвари ҳамзабон инчунин, масъалаҳои расонидани кӯмакҳои техникиро ба Тоҷикистон, таъсиси шабакаи телевизионии кишварҳои форсизабонро баррасӣ намуданд.                   Баъд аз мулоқоташ Зарқомӣ аз марказҳои танзим ва пахши барномаю гуфторҳои радиои Тоҷикистон, муассисаи давлатии «Ҷаҳоннамо», телевизиони кӯдакону наврасон «Баҳористон» дидан намуда, бо фаъолияти ин муассисаҳо шинос шуд. Раиси Созмони садо ва симои Эрон ҳамзамон дар барномаи «Пайванд»-и Шабакаи якуми телевизиони Тоҷикистон иштирок карда, бо фаъолияти телевизиони Тоҷикистон ошно гардид.