ТӮҲФАИ РАИСИ ВИЛОЯТ БА КИТОБХОНАҲО

                     Қӯрғонтеппа, 30 март. (АМИТ «Ховар», Мурод Сотиев). — Роҳбарони мақомоти давлатӣ, корхонаю ташкилот ва муассисаҳои вилояти Хатлон дар асоси дастурҳои президенти кишвар дар бораи ғанитар гардондани ганҷинаи китобхонаҳои маҳаллӣ тадбирҳои судбахш меандешанд. Мухбири АМИТ «Ховар» хабар медиҳад, ки раиси вилояти Хатлон Ғайбулло Авзалов чанд рӯз пеш аз китобхонаи шахсии худ ба китобхонаи маркази вилоят 300 ҷилд китоб тӯҳфа кард. Инчунин, кумитаҳои вилоятии кор бо ҷавонон, варзиш ва сайёҳӣ ва кор бо занон ва оила ба китобхонаҳои шаҳрию вилоятии Қӯрғонтеппа мувофиқан 300 ва 1510 ҷилд китоб тӯҳфа карданд.                     Раёсати маорифи вилоят ба китобхонаи мактабҳо 230 ҷилд китоб тӯҳфа намуд. Ба қавли мутахассиси шӯъбаи иттилоотию таҳлилии дастгоҳи раиси вилоят Нарзулло Олимов, роҳбарони шаҳру ноҳияҳо ва корхонаю муассисаҳо ин ташаббуси некро ҳамаҷониба дастгирӣ менамоянд. Дар натиҷа хазинаи китобхонаҳо торафт бойтар мегардад, гуфт вай.