ҲУКУМАТИ ШАҲР ҲАМ ҲУҚУҚИ ҲАЗЛ КАРДАН ДОРАД

                      Душанбе, 1 апрел. (АМИТ «Ховар», Лаззат Диловарзод).- Тибқи иттилои муовини сардори корхонаи воҳиди давлатии «Автобус-1»-и шаҳри Душанбе Ҳамзаалӣ Ғаниев, дар ин корхона 150 автобус ба сокинони пойтахт хизмат мерасонад.                      Тибқи реҷаи корӣ дар хатсайри Р3 — 28 автобус, Р18- 34 адад, Р8-36 ва Р29- 35 автобус ба тарзи мунтазам бояд ҳаракат намояд. Дар як рӯз барои ҳар як автобуси дар хатсайрбуда аз 60 то 70 литр сӯзишвории дизелӣ дода мешавад ва аз натиҷаи маҳсули кори он баъди анҷоми басти корӣ ба хазинаи корхона 270 сомонӣ пардохт карда мешавад.                      Корхона дар 3 баст фаъолият мекунад ва охирин автобус соати 23 вориди корхона мегардад.                      Тибқи иттилои ронандагон, сӯзишвории додашуда танҳо барои 4-5 даври гардиши хатсайр басандааст. Аз ин рӯ онҳо наметавонанд то иваз шудани басти корӣ мунтазам фаъолият кунанд.                       Тибқи ваъдаҳо аз 1-уми апрел автобусҳои нав ба кор мебароянд.                       Агар ин ҳазли шаҳрдорон дар рӯзи 1-уми апрел набошад, пас беҳбудии хизматрасонии нақлиётро интизор хоҳем шуд.