АҲОЛИИ КАМБИЗОАТИ СУҒД БО ЛАМПАҲОИ КАММАСРАФ РОЙГОН ТАЪМИН МЕШАВАНД

                  Душанбе, 22 апрел. (АМИТ «Ховар», Бекназари Абӯбакр). — Дар маҷлисгоҳи мақомоти иҷроияи ҳокимияти давлатии вилояти Суғд нахустҷаласаи Комиссияи вилоятӣ оид ба таъмини аҳолии вилоят бо лампаҳои каммасраф баргузор гардид. Дар ҷаласа, ки дар партави Паёми Президенти Ҷумҳурии Тоҷикистон барпо шуд, андешидани чораҳои мушаххас оид ба гузаштан ба ин навъи фурӯзонакҳо мавриди муҳокима қарор гирифт.                    Аз маркази иттилоот ва таҳлили дастгоҳи раиси вилояти Суғд ба АМИТ «Ховар» иттилоъ доданд, ки ҷаласаи мазкур таҳти сарварии муовини аввали раиси вилоят Шакарбек Самадов баргузор гардида, дар он ба муовинони раиси шаҳру ноҳияҳои вилоят супориш дода шуд, ки оид ба таъмин намудани аҳолӣ бо лампаҳои каммасрафи барқӣ дар мӯҳлатҳои кӯтоҳтарин комиссияҳои доимоамалкунанда таъсис диҳанд ва барои ҳарчӣ тезтар амалӣ намудани супориши Сарвари давлат оид ба ба роҳ мондани истифодаи фурӯзонакҳои мутазаккира чораҳои мушаххас андешанд.                   Ҳамчунин зикр гардид, ки масъулини дахлдори мақомоти иҷроияи ҳокимияти давлатии вилояти Суғд барои мушаххас кардани теъдоди аҳолии камбизоат, ҳаҷми маблағҳо барои ин кор, омӯзиши сифати лампаҳои каммасрафи дар дӯкону бозорҳои вилоят мавҷуда ва ройгон таъмин намудани оилаҳои камбизоат бо ин намуди лампаҳо, тадбирҳои зарурӣ андешанд.