ДАР ДУШАНБЕ АНҶУМАНИ ҚАЗОҚҲОИ ОМ, АФҒОНИСТОН ВА ЭРОН БАРГУЗОР МЕШАВАД

                       Душанбе, 16 апрел.(АМИТ «Ховар», Марзия Саидова).-20 апрел дар шаҳри Душанбе нахустин анҷумани (қурултой) қазоқҳои сокини кишварҳои Осиёи Марказӣ ва Афғонистону Эрон баргузор мегардад. Ин чорабинӣ бо ибтикори Сафорати Ҷумҳурии Қазоқистон дар Ҷумҳурии Тоҷикистон ва ҷамъияти қазоқҳои Тоҷикистон «Байтерек» гузаронида мешавад.                      Назар ба иттилои раиси ҷамъияти «Байтерек» Зауре Саминова, дар анҷуман намояндагони чамъиятҳои қазоқҳои сокини кишварҳои Осиёи Марказӣ, Эрон ва Афғонистон иштирок намуда, масъалаҳои ҳамбастагӣ ва ҳифзи фарҳанг, забон ва дигар анъанаҳои миллии халқи қазоқро баррасӣ менамоянд.                      Ҳайати Қазоқистонро дар нахустин анҷуман муовини аввали Раиси Анҷумани байналмилалии қазоқҳо Талгат Мамашев роҳбарӣ менамояд.                      Ба анҷуман намояндагони дастгоҳи иҷроияи Президенти Ҷумҳурии Тоҷикистон, намояндагони мақомоти иҷроияи ҳокимияти маҳалии шаҳру ноҳияҳои Тоҷикистон даъват шудаанд. Иштирокдорони анҷуман ба як қатор ноҳияҳои вилояти Хатлон сафар намуда, бо ҳаёту рӯзгори қазоқҳои сокини ин минтақа шинос мешаванд.