ДАР МӮЪМИНОБОД НИШАСТИ МАТБУОТӢ ДОИР ГАШТ

                  Мӯъминобод, 22 апрел. (АМИТ «Ховар», Сулаймон Холов).- Дар ноҳияи Мӯъминобод нишасти матбуотӣ доир гардид. Сафаралӣ Зокиров, раиси ноҳия доир ба вазъи иқтисодию иҷтимоии ноҳия дар тӯли 3 моҳи соли равон ахборот дод. Аз ҷумла қайд намуд, ки меҳнаткашони ноҳия ба таъсири бӯҳрони молиявии ҷаҳонӣ нигоҳ накарда аз тамоми имконияту захираҳои дохилӣ истифода бурда ба муваффақиятҳои назаррас ноил гаштанд. Дар ин давра нақшаи андоз 105 фоиз таъмин гардид, ки нисбати нақша 29685 сомонӣ ва нисбати ҳамин давраи соли гузашта 253434 сомонӣ зиёд аст. Инчунин, дар давраи ҳисоботӣ баҳри рушди соҳаи кишоварзӣ ва соҳибкории хурду миёна аз тарафи бонкҳои ноҳия 2 миллиону 227 ҳазору 821 сомонӣ қарзҳои имтиёзнок ҷудо гардид, ки ба беҳтар шудани соҳаҳои афзалиятноки хоҷагии халқи ноҳия мусоидат менамояд. Дар ноҳия нақшаи маҳсулотайёркунӣ таъмин гардида, дар ин давра 3 тонна гушт, 2 тонна шир, 9 ҳазор дона тухм, 7 тонна картошка, 10 тонна сабзавот ва дигар маҳсулотҳо тайёр карда шудааст. Зимни нишаст вобаста ба мавзӯи пешгирии бӯҳрони молиявию ҷаҳонӣ дар ноҳия, дастгирии Пайёми Президент ба мо, соҳаҳои маориф, тандурустӣ, сохтмон, заминсозӣ, обёрӣ намудани заминҳои кишоварзӣ саволу ҷавоб сурат гирифт. Раиси ноҳия Сафаралӣ Зокиров ба саволҳои хабарнигорон ҷавобҳои мушаххас гардонид.