ДЕҲҚОНИРО АЗ ҲИСОРИҲО БОЯД ОМӮХТ

                  Ҳисор, 22 апрел. (АМИТ «Ховар», Ҳотам Рабиев).- «Дар вазъияте, ки бӯҳрони молиявию иқтисодӣ тамоми ҷаҳонро фаро мегирад, мо вазифадорем, ки аз ҳар ваҷаб замин самаранок истифода бурда дар таъмини амнияти озуқавории кишвар ҳиссаи босазо гузорем», — иброз дошт раиси ноҳияи Ҳисор, узви Маҷлиси миллии Маҷлиси олии Ҷумҳурии Тоҷикистон Муҳаммадалӣ Очилдӣ дар ҷараёни нишасти матбуотие, ки рӯзи 21 апрел дар бинои мақомоти иҷроияи ҳокимияти давлатии ин ноҳия баргузор гардид.                    Алҳол дар тамоми заминҳои хоҷагиҳои ноҳия зироатҳо тирамоҳӣ ва баҳорӣ дар авҷи сабзишанд. Ҳамчунин, деҳқонон мақсад доранд, ки дар рӯзҳои наздик дар масоҳати 2 ҳазору 500 гектар кишти чигитро ба анҷом расонанд. Лозим ба тазаккур аст, ки деҳқонони ноҳияи Ҳисор соли гузашта дар масоҳати 4 ҳазор гектар кишти такрорӣ гузаронда, ҳосили фаровон ба даст оварданд. Имсол низ онҳо мақсад доранд, ки дар масоҳати зиёда аз 4 ҳазор гектар кишти такрорӣ гузаронанд.                     Бахшида ба соли бузургдошти Имоми Аъзам дар тамоми ҳудуди ноҳия чорабиниҳои гуногун баргузор мегарданд. Аз ҷумла дар ҷамоати Мирзо Ризо бинои сохтмони маркази фарҳангӣ ба номи Имоми Аъзам босуръат идома дорад. Дар назар аст, ки яке аз чорабиниҳои калони ҷумҳуриявӣ бахшида ба 1310 солагии ин абармарди олами ислом дар ин ҷо баргузор гардад.                     Дар ҷараёни нишасти матбуотӣ хабарнигорон аз раиси ноҳияи Ҳисор ва дигар масъулини мақомоти иҷроия ба суолҳои сершумори худ ҷавобҳои қаноатбахш дарёфт намуданд.