ХИЗМАТҲОИ БЕШ АЗ 40 НАФАР РАИСОНИ ШАҲРАКУ МАҲАЛЛАҲО ҚАДР ШУД

                  Душанбе, 20 апрел.(АМИТ «Ховар», Марзия Саидова).-Дар ҷамъомаде, ки ба муносибати Рӯзи пойтахт дар «Маркази равобити пойтахт» бо иштироки раиси шаҳри Душанбе Маҳмадсаид Убайдуллоев баргузор шуд, хизматҳои зиёда аз 40 нафар раисони Шӯрои шаҳраку маҳаллаҳо, ки синнашон ба нафақа расидаанд ва дар рушду пешрафти соҳаҳои гуногуни шаҳр саҳми арзанда гузоштаанд, қадрдонӣ гардид. Ба онҳо дар маҷмӯъ 21 ҳазор сомонӣ мукофотҳои пулӣ супорида шуд.  Минбаъд ба ҷои онҳо ҷавонони болаёқат дар вазифаи раисони Шӯрои шаҳраку маҳаллаҳо фаъолият менамоянд.                 Раиси шаҳри Душанбе тамоми иштирокчиёни ҷамъомадро бо Рӯзи пойтахт табрик намуда, аз шаҳрвандон ҷиҳати саҳм гузоштан дар рушду ободонӣ ва шукуфоии шаҳри Душанбе матонату устуворӣ ва масъулияти баланди шаҳрвандӣ хостор шуд.                 Бояд тазаккур дод, ки соли 5-ум аст, ки Рӯзи пойтахт таҷлил гардида, он ба иди ҳақиқии дӯстиву ваҳдат ва созандагию бунёдкории сокинони Душанбе табдил гардидааст.