ИСТИФОДАИ МАНБАЪҲОИ ҒАЙРИМУҚАРРАРИИ ҚУВВАИ БАРҚ

               Хуҷанд. (АМИТ «Ховар» Мирзалӣ Амонов, Самад Юсуфӣ).-Таҷҳизоти истеҳсоли нерӯи барқ аз нури офтоб, рӯшнои ва шамол аз сарчашмаҳои тавлиди энергияи барқ ба ҳисоб меравад. Ин таҷҳизоти истеҳсоли нерӯи барқ тадриҷан дар корхонаву муассисаҳо ва хонаҳои аҳолӣ истифода мегардад. Аввалин чунин таҷҳизот дар корхонаи муштараки «САМО»-и ш.Хуҷанд барои истеҳсоли нерӯи барқ мавриди истифода қарор гирифтааст.              Бино ба иттилои директори корхона Абдуманнон Тошхӯҷаев чунин таҷҳизот дар шаҳру ноҳияҳои Хуҷанд, Б.Ғафуров ва Спитамени вилояти Суғд, ноҳияи Шӯроободи вилояти Хатлон ва ноҳияи Ҳисор дар корхонаву муассисаҳо ва хонаҳои истиқоматии аҳолӣ васлу насб гардидааст. Тавассути ин таҷҳизот аз нури офтобу рӯшноӣ ва аз шамол нерӯи барқ истеҳсол карда мешавад.